Падзеі

Прэзідэнт таксама звярнуў асаблівую ўвагу на развіццё буйных рэгіянальных цэнтраў, такіх як Орша, Бабруйск, Барысаў або Баранавічы. У частцы развіцця Аршанскага раёна Прэзідэнтам ужо былі дадзены адпаведныя даручэнні, і ў бліжэйшы час гэтыя пытанні будуць разглядацца на выязной урадавай нарадзе.

Аляксандр Лукашэнка назваў гэтыя і падобныя да іх па значнасці беларускія гарады з тэрыторыямі вакол іх рэгіёнамі, падкрэсліўшы тым самым важнасць комплекснага развіцця гэтых тэрыторый як з пункту гледжання вытворчай сферы, так і вырашэння сацыяльных пытанняў. "Гэтыя рэгіёны - чарговая эпапея, якую мы пачынаем. І мы павінны вельмі хутка вырашыць гэтыя праблемы", - сказаў кіраўнік дзяржавы.

"Патрэбны жалезны парадак. Размовы скончаны, - падкрэсліў Прэзідэнт. - Спасылак на тое, што чагосьці там не хапіла, быць не павінна. Вы сёння выходзіце і ад імя Прэзідэнта ажыццяўляеце тую палітыку, пра якую я так шмат гавару. Вы ведаеце, што там трэба рабіць", - звярнуўся Аляксандр Лукашэнка да новых кіраўнікоў мясцовых выканаўчых і распарадчых органаў.

Асобна Прэзідэнт закрануў пытанні ідэалогіі. Ён падкрэсліў, што работа ў гэтай сферы не павінна зводзіцца толькі да таго, каб некуды прыйсці і прачытаць лекцыю. "Самая вялікая ідэалогія - гэта там, дзе ўзнімаецца дух людзей, дух народа. Я цяпер маю на ўвазе не звычайныя грамадскія масавыя мерапрыемствы, а спартыўныя", - адзначыў кіраўнік дзяржавы.

У сувязі з гэтым Аляксандр Лукашэнка звярнуў увагу, што культурна-спартыўныя комплексы, пабудаваныя ў розных гарадах, у тым ліку ў Оршы, часам не ў поўнай меры задзейнічаны. На іх базе няма спартыўных каманд. Пры гэтым у рэспубліцы ёсць перспектыўныя трэнерскія кадры, якія гатовы ў рэгіёнах займацца развіццём тых ці іншых відаў спорту. "Трэба гэтых людзей запрашаць, забяспечыць жыллём. Там, дзе ёсць гэтыя каткі, трэба ствараць школы і каманды - асноўная, дубліруючы склад, школа для дзяцей і масавае катанне. Гэтыя аб'екты не павінны пуставаць", - сказаў кіраўнік дзяржавы.