Падзеі

Лукашэнка падпісаў распараджэнне аб павышэнні эфектыўнасці сістэмы аховы здароўя

Фота з архiва

2 чэрвеня, Мінск /Кар. БЕЛТА/. Прэзідэнт Беларусі Аляксандр Лукашэнка падпісаў распараджэнне "Аб павышэнні эфектыўнасці работы сістэмы аховы здароўя", паведамілі БЕЛТА у прэс-службе беларускага лідара.

Па выніках нарады, якая адбылася 23 мая 2023 года, кіраўніком дзяржавы дадзены канкрэтныя даручэнні аб навядзенні парадку ва ўстановах аховы здароўя ўсіх узроўняў, стварэнні ўмоў для аказання якаснай медыцынскай дапамогі насельніцтву. Пры гэтым асаблівая ўвага павінна ўдзяляцца вясковым жыхарам.

На старшынь мясцовых органаў улады ўскладзена персанальная адказнасць за санітарна-тэхнічны стан будынкаў і збудаванняў устаноў аховы здароўя.

Міністэрству аховы здароўя дадзены даручэнні аб пераглядзе нарматыўных прававых актаў, якія рэгулююць медыцынскую і фармацэўтычную дзейнасць, аказанне платных медыцынскіх паслуг, з улікам правапрымяняльнай практыкі.

У прыватнасці, неабходна скарэкціраваць парадак дыспансерызацыі насельніцтва, скараціць тэрміны чакання высокатэхналагічных аперацыйных умяшанняў і дыягнастычных даследаванняў.

Даручана прыняць дадатковыя меры па рашэнні праблемы недахопу медыкаў, найбольш востры дэфіцыт якіх назіраецца ў сельскай мясцовасці, павышэнні якасці іх падрыхтоўкі і замацаванні на працоўных месцах. Будзе перагледжаны парадак налічэння заработнай платы медработнікам з павелічэннем долі службовага акладу.

Дадзены даручэнні па забеспячэнні распрацоўкі новых запатрабаваных медыкаментаў, павелічэнні аб'ёмаў вытворчасці і пашырэнні наменклатуры айчынных лекавых прэпаратаў, а таксама ўдасканаленні сістэмы кіравання фармацэўтычнай галіной.

Сфарміраваная Прэзідэнтам міжведамасная рабочая група да канца года прадоўжыць праверку сістэмы аховы здароўя, у тым ліку маніторынг вырашэння выяўленых праблемных пытанняў.

Даклады аб выніках праведзенай работы будуць прадстаўлены кіраўніку дзяржавы ў студзені 2024 года.

версія для друку

зрабіць стартавай

дабавіць у выбранае