Падзеі

Лукашэнка: нам не патрэбны ніякія замежныя ўрады, ніякія пасрэднікі

15 жніўня, Мінск /Кар. БЕЛТА/. Прэзідэнт Беларусі Аляксандр Лукашэнка падкрэслівае, што ў краіне ёсць свой створаны па Канстытуцыі ўрад, а краінам, якія цяпер спрабуюць выступаць пасрэднікамі, варта ў першую чаргу навесці парадак у сябе. Аб гэтым кіраўнік дзяржавы Аляксандр Лукашэнка заявіў сёння на нарадзе ў Цэнтры стратэгічнага кіравання ў Міністэрстве абароны Беларусі, перадае карэспандэнт БЕЛТА.

Кіраўнік дзяржавы выказаўся аб унутрыпалітычнай сітуацыі. "Вы не горш за мяне ведаеце, што адбываецца ў краіне. Паціху пачынаюць або прадаўжаюць расхістваць абстаноўку, наша грамадства. Дабраліся да працоўных калектываў. Я ўжо шмат разоў гаварыў аб гэтым. Проста хачу чарговы раз сказаць, што з гэтага нічога не атрымаецца. Краіну мы нікому не аддадзім. Сітуацыю мы ўтрымаем, - падкрэсліў беларускі лідар. - Я не хачу сказаць, што ёсць месца для нейкай лагоднасці, заспакоенасці. Не, мы ніколі не заспакойваліся. Вы ведаеце, жыццё наша такое і лёс, што мы, знаходзячыся ў цэнтры Еўропы, заўсёды павінны быць гатовымі своечасова адказаць на любыя выклікі".

Аляксандр Лукашэнка адзначыў, што за мяжой Беларусі прапануюць нейкае пасрэдніцтва, ствараюць для краіны замежны ўрад. "Вы, напэўна, заўважылі, што кіраўнікі Літвы, Латвіі, Польшчы і, на жаль, загучалі галасы з Украіны, далучыліся да іх, выпрацаваўшы пэўную пазіцыю, прапанавалі ўладам Беларусі нейкае пасрэдніцтва. Калі я гэта пачуў, я доўга думаў: пасрэдніцтва паміж кім і кім? Кажуць, уладам Беларусі прапанавалі. Гэта значыць мы будзем выступаць як адзін з бакоў. Пра другі бок не гавораць, - адзначыў кіраўнік дзяржавы. - Я так разумею, нядаўна яны там стварылі ці то камітэт ратавання, ці то ўрад у выгнанні. Увогуле, стварылі ўрад за мяжой для Беларусі. Слухайце, у нас ёсць нармальны ўрад, створаны па Канстытуцыі. Нам не патрэбны ніякія замежныя ўрады, ніякія пасрэднікі. Мне здаецца, што, не крыўдзячы кіраўніцтва гэтых рэспублік, я хачу сказаць: вы ў сябе парадак навядзіце", - сказаў Прэзідэнт.

"Ніякі ўрад ні за мяжой, дзе б там ні было, нам не патрэбны, і кіраваць ён краінай не будзе ніколі. Няўжо гісторыю не вывучалі?" - падкрэсліў кіраўнік дзяржавы.

версія для друку

зрабіць стартавай

дабавіць у выбранае