Падзеі

Аляксандр Лукашэнка адзначыў, што цяпер у Беларусі няма магчымасці прадастаўляць падатковыя льготы ў ранейшым аб'ёме. "Калі раней на пэўным этапе ў нас была магчымасць прадастаўляць такія падатковыя льготы, цяпер іншы час. Ад індывідуальных ільгот наогул, напэўна, трэба адыходзіць", - лічыць кіраўнік дзяржавы.

"Мы павінны зыходзіць з прынцыпу, калі ўсе суб'екты гаспадарання працуюць у аднолькавых умовах. Выключэнне могуць складаць толькі прыярытэтныя віды дзейнасці, якая ўяўляюць цікавасць для дзяржавы з пункту гледжання стварэння ўмоў для эфектыўнага развіцця і, вядома ж, атрымання аддачы", - сказаў Аляксандр Лукашэнка.

Цяпер у краіне дзейнічае амаль 250 падатковых ільгот. Бюджэт толькі ў 2013 годзе недабраў з-за гэтага каля мільярда долараў ЗША. Прэзідэнт адзначыў, што падатковыя льготы патрэбны, каб стымуляваць прыярытэтныя віды дзейнасці і дабіцца важкай аддачы. "Аднак, трэба прызнаць, што мы надавалі столькі льгот, што цяпер самі з цяжкасцю можам разабрацца", - канстатаваў кіраўнік дзяржавы.

Закранаючы пытанне падатковай нагрузкі, Аляксандр Лукашэнка заўважыў: "Трэба ўсебакова разгледзець гэта пытанне. Але ні ў якім выпадку не трэба шарахацца". Больш за ўсё нараканняў у сувязі з гэтым ідзе ў адрас плацяжоў на пенсійнае і сацыяльнае страхаванне, канстатаваў Прэзідэнт. Разам з тым ён адзначыў, што ў нас сацыяльна арыентаваная дзяржава.

У час нарады таксама закраналася пытанне ажыццяўлення падатковага кантролю. Кіраўнік дзяржавы падкрэсліў, што падатковая інспекцыя - гэта не кансультант, які ўвесь час нешта растлумачвае і падказвае бухгалтару, але гэтага не пазбегнуць. "Нікуды не дзенешся, у жыцці заўсёды так бывае, што, правяраючы, кантралюючы, падатковаму інспектару даводзіцца кансультаваць прадпрымальнікаў, раіць бухгалтарам. Але гэта не галоўная функцыя падатковага інспектара", - адзначыў Аляксандр Лукашэнка. "Работнік падатковых органаў - гэта кантралёр! У многіх краінах, і гэта ніхто не ўтойвае, падатковая - галоўны фіскальны орган дзяржавы, і для нас важная задача - павысіць статус і прэстыж падатковай службы", - падкрэсліў Прэзідэнт. "Нельга забываць, што без падаткаў няма дзяржавы. Аднак падаткі - гэта не толькі фіскальны інструмент, але і стымул для развіцця эканомікі. Таму перабору быць не павінна", - падагульніў Аляксандр Лукашэнка.