Падзеі
Лукашэнка дапамог урэгуляваць сітуацыю з ПВК "Вагнер". Падрабязнасці напружанага перагаворнага дня
Фота з архiва
26 чэрвеня, Мінск /Кар. БЕЛТА/. Прэзідэнт Беларусі Аляксандр Лукашэнка 24 чэрвеня паспяхова дапамог пераадолець найбольш вострую фазу сітуацыі ў Расіі, звязанай са спробай ваеннага мяцяжу кіраўніка ПВК "Вагнер" Яўгена Прыгожына, паведамляе БЕЛТА.
Кіраўнік беларускай дзяржавы правёў напружаны суботні дзень, які ўключаў нарады з сілавікамі і ваеннымі, кантакты з Прэзідэнтам Расіі Уладзімірам Пуціным і перагаворы з Яўгенам Прыгожыным. Перагаворы доўжыліся на працягу ўсяго дня, і ў выніку развязкі знойдзены.
Як развівалася сітуацыя
Раней паведамлялася, што Федэральная служба бяспекі Расіі ўзбудзіла крымінальную справу супраць кіраўніка і заснавальніка прыватнай ваеннай кампаніі "Вагнер" Яўгена Прыгожына ў сувязі з заклікам да ўзброенага мяцяжу. Рашэнне было прынята ў сувязі з распаўсюджанымі раней у сацыяльных сетках паведамленнямі і відэаматэрыяламі, у якіх Яўген Прыгожын сцвярджае, што з боку МА РФ былі зроблены ўдары па тылавых лагерах ПВК. Міністэрства абароны абнародавала абвяржэнне гэтай інфармацыі. У ваенным міністэрстве РФ таксама адзначылі, што яна з'яўляецца дэзай, якая мае характар правакацыі. ФСБ Расіі пасля ўзбуджэння крымінальнай справы запатрабавала спыніць проціпраўныя дзеянні.
Аб падзеях вакол Яўгена Прыгожына быў інфармаваны Прэзідэнт Расійскай Федэрацыі Уладзімір Пуцін. Прэс-сакратар расійскага лідара Дзмітрый Пяскоў удакладніў, што прымаюцца ўсе неабходныя меры. Пазней Пяскоў паведаміў, што Мінабароны, ФСБ, МУС, Расгвардыя ў кругласутачным рэжыме дакладвалі Пуціну аб мерах, якія прымаюцца пасля дадзеных кіраўніком дзяржавы даручэнняў у сувязі са спробай узброенага мяцяжу, інфармаваў ТАСС.
Фота прэс-службы прэзідэнта РФ
Мінабароны РФ назвала ўзброеным мяцяжом сітуацыю з Прыгожыным. У міністэрстве заклікалі прадстаўнікоў ПВК "Вагнер" праявіць разважлівасць і выйсці на сувязь з прадстаўнікамі ведамства або праваахоўных органаў. Крыху пазней у Мінабароны заявілі, што ўжо дапамаглі камандзірам і байцам "Вагнера", якія звярнуліся да ведамства, бяспечна вярнуцца ў пункты пастаяннай дыслакацыі.
Намеснік камандуючага аб'яднанай групоўкай расійскіх войскаў у раёне правядзення спецыяльнай ваеннай аперацыі Сяргей Суравікін заклікаў прыватную ваенную кампанію "Вагнер" падпарадкавацца загаду Прэзідэнта Расіі і вырашыць усе праблемы мірным шляхам.
У некаторых абласцях Расіі з-за спробы ваеннага мяцяжу быў уведзены рэжым контртэрарыстычнай аперацыі, у тым ліку на тэрыторыі Масквы і Маскоўскай вобласці.
Ранішні званок ад Пуціна і нарады
Раніцай 24 чэрвеня Прэзідэнт Расіі патэлефанаваў Прэзідэнту Беларусі, адбылася тэлефонная размова.
Уладзімір Пуцін праінфармаваў свайго беларускага калегу аб сітуацыі на поўдні Расіі з прыватнай ваеннай кампаніяй "Вагнер". Кіраўнікі дзяржаў дамовіліся аб сумесных дзеяннях.
Аляксандр Лукашэнка на фоне падзей у Расіі правёў дзве нарады. Нарады прайшлі раніцай і пасля абеду. На іх былі запрошаны кіраўніцтва сілавога блока і ваенныя.
Зварот Прэзідэнта Расіі
Тым часам Уладзімір Пуцін выступіў з тэлезваротам, у якім заявіў, што расійскае кіраўніцтва не дасць паўтарыцца ў краіне грамадзянскай вайне. "Мы не дадзім гэтаму паўтарыцца, абаронім і наш народ, і нашу дзяржаўнасць ад любых пагроз, у тым ліку ад унутранай здрады", - заявіў Прэзідэнт Расіі.
Дзеянні кіраўніцтва ПВК "Вагнер" Уладзімір Пуцін назваў здрадай. "Любая ўнутраная смута - смяротная пагроза для нашай дзяржаўнасці, - падкрэсліў ён. - Дзеянні супраць такой пагрозы будуць жорсткімі. Усе, хто свядома стаў на шлях здрады, хто рыхтаваў узброены мяцеж, стаў на шлях шантажу і тэрарыстычных метадаў, будуць пакараныя. Адкажуць і перад законам, і перад нашым народам".
Уладзімір Пуцін таксама запэўніў, што як Прэзідэнт, Вярхоўны галоўнакамандуючы, як грамадзянін Расіі зробіць усё, каб абараніць краіну, абараніць канстытуцыйны лад, жыццё і бяспеку, свабоду грамадзян.
Фота з архiва
Перагаворы Лукашэнкі з Прыгожыным
У развіццё дамоўленасцей з расійскім лідарам Прэзідэнт Беларусі, дадаткова ўдакладніўшы па існуючых уласных каналах сітуацыю, па ўзгадненні з Прэзідэнтам Расіі правёў перагаворы з кіраўніком ПВК "Вагнер" Яўгенам Прыгожыным.
Перагаворы доўжыліся на працягу ўсяго дня. У выніку чаго прыйшлі да дамоўленасцей аб недапушчальнасці развязвання крывавай бойні на тэрыторыі Расіі. Яўген Прыгожын прыняў прапанову Прэзідэнта Беларусі Аляксандра Лукашэнкі аб спыненні руху ўзброеных асоб кампаніі "Вагнер" на тэрыторыі Расіі і далейшых кроках па дээскалацыі напружання.
"На гэты момант на стале - абсалютна выгадны і прымальны варыянт развязкі сітуацыі, з гарантыямі бяспекі для байцоў ПВК "Вагнер", - інфармавала прэс-служба Прэзідэнта Беларусі.
Разварот на 180 градусаў
У хуткім часе пасля сенсацыйнай навіны аб удзеле Аляксандра Лукашэнкі ва ўрэгуляванні сітуацыі з'явілася навіна аб тым, што калоны ПВК "Вагнер" разварочваюцца і ідуць у адваротным напрамку. Аб гэтым інфармавалі РІА Навіны са спасылкай на Яўгена Прыгожына.
"Разумеючы ўсю адказнасць за тое, што будзе праліта руская кроў з аднаго з бакоў, мы разварочваем свае калоны і ідзём у адваротным напрамку ў палявыя лагеры ў адпаведнасці з планам", - сказаў ён.
Было таксама заяўлена аб намеры байцоў ПВК "Вагнер" пакінуць Растоў-на-Доне.
Фота ТАСС
Вячэрняя размова з Пуціным
У дзевяць гадзін вечара 24 чэрвеня прэзідэнты Беларусі і Расіі зноў паразмаўлялі па тэлефоне.
Аляксандр Лукашэнка падрабязна праінфармаваў Уладзіміра Пуціна аб выніках перагавораў з кіраўніцтвам ПВК "Вагнер".
Прэзідэнт Расіі падтрымаў і падзякаваў беларускаму калегу за праведзеную работу.
версія для друку
зрабіць стартавай
дабавіць у выбранае