Падзеі

Лукашэнка даў інтэрв'ю турэцкаму інфармагенцтву "Анадолу"

8 красавіка, Мінск /Кар. БЕЛТА/. Прэзідэнт Беларусі Аляксандр Лукашэнка сёння даў інтэрв'ю буйнейшаму інфармацыйнаму агенцтву Турцыі "Анадолу", паведамляе карэспандэнт БЕЛТА.

Аляксандру Лукашэнку было зададзена каля дзесяці пытанняў. У Прэзідэнта пацікавіліся меркаваннем адносна нарастання напружанасці ў рэгіёне і свеце ў цэлым і ў сувязі з гэтым асаблівасцямі знешняй палітыкі Беларусі, яе ўкладам ва ўрэгуляванне канфлікту ва Украіне. Кіраўнік дзяржавы расказаў аб падыходах Беларусі ў міжнародных адносінах, даў ацэнку ходу прэзідэнцкіх выбараў ва Украіне.

Была закранута праблематыка беларуска-турэцкіх адносін. Аляксандр Лукашэнка прыадкрыў падрабязнасці маючага адбыцца візіту ў Турцыю, ацаніў перспектывы двухбаковага супрацоўніцтва і расказаў аб асабістых адносінах з Прэзідэнтам Турцыі Рэджэпам Таіпам Эрдаганам.

Інтэрв'ю прайшло напярэдадні афіцыйнага візіту Аляксандра Лукашэнкі ў Турцыю, які запланаваны на сярэдзіну красавіка. У якасці інтэрв'юера выступіў кіраўнік маскоўскага карэспандэнцкага пункта "Анадолу" Алі Джура. У Беларусі, дарэчы, турэцкі журналіст не ўпершыню: у 2007-2009 гадах ён навучаўся ў Мінскім дзяржаўным лінгвістычным універсітэце.

Пасля размовы з кіраўніком дзяржавы Алі Джура прызнаўся беларускім журналістам, што марыў узяць інтэрв'ю ў Прэзідэнта Беларусі яшчэ 13 гадоў таму. Паводле слоў прадстаўніка "Анадолу", яго размова з Аляксандрам Лукашэнкам нагадвала размову блізкіх людзей. "Такія адчуванні для журналіста - вельмі вялікі плюс", - сказаў Алі Джура.

Ён разлічвае, што дзякуючы інтэрв'ю кіраўніка дзяржавы пазіцыя Беларусі і яе лідара ў турэцкіх СМІ будзе адлюстравана без скажэнняў. "Мы стараемся паказаць сапраўдную Беларусь", - адзначыў журналіст. На яго думку, у Беларусі і Турцыі ёсць добрыя перспектывы для развіцця адносін, напрыклад у прамысловасці.

Інфармацыйнае агенцтва "Анадолу" было створана ў 1920 годзе. Навіны "Анадолу" выходзяць больш як на 10 мовах і распаўсюджваюцца ў 45 краінах свету. Агенцтва мае свае прадстаўніцтвы ў больш як 35 краінах, штодзённа публікуецца звыш 4 тыс. паведамленняў навін, фота- і відэаматэрыялаў. "Анадолу" супрацоўнічае з французскім інфармацыйным агенцтвам Agence France-Presse, з 2016 года з'яўляецца партнёрам Беларускага тэлеграфнага агенцтва.

Тавараабарот паміж Беларуссю і Турцыяй у 2018 годзе дасягнуў $984 млн, склаўшы амаль 105 працэнтаў да ўзроўню 2017 года. Аднак сальда для Беларусі склалася адмоўнае ў памеры $618 млн.

Аснову беларускага экспарту фарміруюць калійныя ўгнаенні, якія змяшчаюць функцыянальную нітрыльную групу злучэння, жгут сінтэтычных ніцей, ільняныя тканіны, полікарбонавыя кіслоты, сінтэтычныя нячэсаныя валокны, дрот з нелегіраванай сталі, паліўная драўніна, газетная папера. Турцыя пастаўляе ў Беларусь сельскагаспадарчую прадукцыю, трыкатажныя палотны і тканіны, сінтэтычныя ніці, адзенне і абутак, часткі і прылады для аўтатрактарнай тэхнікі.

Па выніках 2018 года аб'ём турэцкіх інвестыцый у беларускую эканоміку склаў $43,1 млн. У Беларусі зарэгістравана больш за 300 прадпрыемстваў з удзелам турэцкага капіталу. Краіны працуюць над стварэннем зборачных вытворчасцей камбайнаў "Гомсельмаша" і трактароў МТЗ, абмяркоўваюцца пастаўкі на турэцкі рынак прадукцыі БелАЗа і тэхнікі "Амкадор".

версія для друку

зрабіць стартавай

дабавіць у выбранае