Падзеі
Лукашэнка аб закрыцці пунктаў пропуску: гэта эканамічная правакацыя, Беларусь адкажа
Пункт пропуску "Бераставіца" (сумежны "Баброўнікі")
16 лютага, Мінск /Кар. БЕЛТА/. Прэзідэнт Беларусі Аляксандр Лукашэнка назваў закрыццё пунктаў пропуску на заходніх граніцах краіны эканамічнай правакацыяй, і Беларусь падрыхтавала адказ на гэтыя дзеянні. Аб гэтым ён заявіў у інтэрв'ю замежным і беларускім СМІ, перадае карэспандэнт БЕЛТА.
"Вы бачыце, як паводзіць сябе Польшча, Літва. Пакуль з эканамічнага пункту гледжання яны пастаянна правакуюць. Пераносяць адказнасць на мяне. Вось яны закрылі пункты пропуску. Гэта што такое? Гэта эканамічная правакацыя. Значыць, гандлю няма, няма эканомікі. І вось паступова яны гэтыя правакацыі ўчыняюць. Проста правакуюць нас. Ну, да пары да часу. Цяпер мы думаем аб тым, як на гэта адказаць. Прыняты рашэнні. Адкажам мякка спачатку. Не зразумеюць - узмоцнім. У нас дастаткова для гэтага рычагоў", - сказаў беларускі лідар.
"Але гэта ўсё роўна эскалацыя. Мы вымушаны адказваць. Пакуль сіметрычна, адэкватна. Калі дойдзе да таго, што давядзецца прымаць асіметрычныя меры, мы прымем. Яны на стале. Але мы гэтага не хочам. Мы хочам дружыць з палякамі, літоўцамі, як гэта было заўсёды", - падкрэсліў Аляксандр Лукашэнка.
"Мы нават закрылі вочы на тое, што яны ў школе карты малююць з мяжой пад Мінскам. Яны мараць аб сваім панаванні "ад можа да можа" - ад Балтыкі да Чорнага мора", - дадаў Прэзідэнт. Аднак, заўважыў ён, не толькі Беларусь, але і іншыя дзяржавы не пагодзяцца з такой пастаноўкай пытання.
Кіраўнік дзяржавы ўдакладніў, што ён літаральна сёння раніцай зацвердзіў прадстаўленыя яму прапановы з боку ўрада і МЗС па мерах у адказ.
"Закрылі яны пагранпераходы - нам ад гэтага ні горача ні холадна. Яны чарговы раз выстралілі сабе ў нагу. Мы пад санкцыямі, усё роўна ў Еўропу не едзем. Нашы людзі едуць туды па мінімуму, - заўважыў Прэзідэнт. - А калі мы забаронім, напрыклад, палякам-вадзіцелям пераязджаць граніцу да нас? Тысячы аўтамабіляў, фур да нас прыязджаюць. Вось калі мы закрыем?"
Аляксандр Лукашэнка ўпэўнены, што адной з прычын такіх дзеянняў з боку Польшчы і Літвы стала ўвядзенне Беларуссю бязвізавага рэжыму. "Гэта вельмі моцна па іх ударыла. Асабліва літоўцы, вяртаючыся назад, гавораць: "Якая ж там дыктатура? Мы там свабодна танней можам купіць, заправіць аўтамабіль і іншае, - канстатаваў кіраўнік дзяржавы. - Гэта дрэнна паўплывала на абстаноўку ўнутры".
"Гэта ўпоперак горла нацменам у Польшчы і Літве. Вось яны і пачалі закрываць, каб стварыць праблемы. Для каго, для беларусаў? Не, для сваіх людзей. Калі яны гэта публічна робяць, мы вымушаны адказваць публічна", - дадаў Прэзідэнт.
Кіраўнік дзяржавы падкрэсліў, што калі б прынятыя меры наносілі шкоду эканоміцы Беларусі, то меры ў адказ былі б больш жорсткія. "Калі эскалацыя ў гэтым напрамку прадоўжыцца, мы больш жорстка адкажам", - папярэдзіў беларускі лідар.
версія для друку
зрабіць стартавай
дабавіць у выбранае