Падзеі

Лукашэнка і Пуцін падпісалі дагавор аб гарантыях бяспекі ў рамках СД

6 снежня, Мінск /Кар. БЕЛТА/. Беларусь і Расія заключылі міждзяржаўны дагавор аб гарантыях бяспекі ў рамках Саюзнай дзяржавы. Подпісы пад дакументам на пасяджэнні ВДС у Мінску 6 снежня паставілі кіраўнікі дзвюх дзяржаў Аляксандр Лукашэнка і Уладзімір Пуцін, перадае карэспандэнт БЕЛТА.

"Гэты дагавор дазволіць надзейна абараніць бяспеку Расіі і Беларусі, створыць умовы для далейшага мірнага і ўстойлівага развіцця нашых дзяржаў", - заявіў на пасяджэнні ВДС Прэзідэнт Расіі Уладзімір Пуцін.

Ён расказаў, што дагавор вызначае ўзаемныя саюзніцкія абавязацельствы па забеспячэнні абароны, аховы суверэнітэту, незалежнасці і канстытуцыйнага ладу Расіі і Беларусі, цэласнасці і недатыкальнасці тэрыторый і знешняй граніцы Саюзнай дзяржавы. Прычым з задзейнічаннем усіх існуючых сіл і сродкаў.

"Размова ў тым ліку ідзе і аб расійскай тактычнай ядзернай зброі, размешчанай па прапанове Прэзідэнта Беларусі на тэрыторыі беларускай рэспублікі", - падкрэсліў расійскі лідар.

"Само жыццё прымушае нас звяртаць асаблівую ўвагу на абараназдольнасць нашых дзяржаў. З падпісаннем Канцэпцыі бяспекі Саюзнай дзяржавы і міждзяржаўнага дагавора аб гарантыях бяспекі мы выходзім на беспрэцэдэнтны ўзровень стратэгічнага саюзніцтва і каардынацыі дзеянняў у ваеннай сферы", - падкрэсліў на пасяджэнні ВДС Прэзідэнт Беларусі Аляксандр Лукашэнка.

Паводле яго слоў, гэта дасць магчымасць не дапусціць парушэння тэрытарыяльнай цэласнасці Беларусі і Расіі, захаваць суверэнітэт і незалежнасць, а галоўнае - сфарміраваць гарантыі мірнага жыцця для грамадзян абедзвюх краін.

Як заўважыў кіраўнік беларускай дзяржавы, нават намер Беларусі і Расіі падрыхтаваць новыя дакументы ў сферы бяспекі ўжо ўзрушыў "партнёраў" на Захадзе.

Наконт падрыхтоўкі дагавора міністр замежных спраў Беларусі Максім Рыжанкоў раней тлумачыў: "Першапачаткова была ідэя аб гарантыях бяспекі з боку Расіі ў адносінах да Беларусі, але мы жывём у Саюзнай дзяржаве, і калі мы партнёры, надзейныя саюзнікі і браты, то гарантыі павінны быць узаемнымі. У духу гэтага і пабудаваны дагавор". Паводле яго слоў, палажэнні дакумента поўнасцю задавольваюць абодва бакі.

Дзяржаўны сакратар Савета бяспекі Аляксандр Вальфовіч лічыць дагавор аб гарантыях бяспекі ў рамках СД унікальным дакументам. "Гэта першы нарматыўны дакумент, які сведчыць аб тым, што дзве дзяржавы - адна за адну і гарантуюць адна адной бяспеку пры неабходнасці, у выпадку звароту адной дзяржавы да другой. Гэта вельмі важна", - падкрэсліў ён у размове з журналістамі. Аляксандр Вальфовіч удакладніў, што дагавор аб узаемных гарантыях бяспекі ўлічвае палажэнні Ваеннай дактрыны Расіі, уключаючы прымяненне ядзернай зброі. "Гэта сведчыць аб тым, што ў выпадку пагроз бяспецы Рэспублікі Беларусь Расійская Федэрацыя можа прымяніць ядзерную зброю для абароны нацыянальных інтарэсаў Беларусі", - адзначыў дзяржаўны сакратар Савета бяспекі.

версія для друку

зрабіць стартавай

дабавіць у выбранае