Падзеі

Кіраўнікі ўрадаў краін СНД падпісалі ў Сочы пакет дакументаў аб супрацоўніцтве

8 чэрвеня, Мінск /Кар. БЕЛТА/. Кіраўнікі ўрадаў краін СНД падпісалі ў Сочы пакет дакументаў аб супрацоўніцтве, паведамляе карэспандэнт БЕЛТА.

Удзельнікі пасяджэння разгледзелі ўсе пытанні, уключаныя ў парадак дня, і прынялі 17 дакументаў. Кіраўнікі ўрадаў абмеркавалі і падпісалі пагадненне аб свабодным гандлі паслугамі, заснаванні, дзейнасці і ажыццяўленні інвестыцый.

Адной з асноўных тэм абмеркавання стала развіццё прамысловай кааперацыі дзяржаў - удзельніц СНД. На пасяджэнні былі прыняты адпаведная канцэпцыя і комплекс мер па яе развіцці на перыяд да 2030 года. "Мэты канцэпцыі - стварэнне новых высокатэхналагічных галін, паскоранае развіццё і мадэрнізацыя прамысловай вытворчасці ў краінах Садружнасці, яго тэхналагічнае абнаўленне, павелічэнне аб'ёмаў вытворчасці і экспарту канкурэнтаздольнай, інавацыйнай і навукаёмістай прадукцыі з высокай доляй дабаўленай вартасці, а таксама дасягненне міжнародных стандартаў па якасці прадукцыі, стварэнне новых працоўных месцаў, павышэнне ўзроўню дабрабыту і якасці жыцця насельніцтва", - расказалі ў прэс-службе Выканкама СНД.

Комплекс мер па развіцці прамысловай кааперацыі дзяржаў - удзельніц СНД на перыяд да 2030 года выступае механізмам рэалізацыі канцэпцыі і прадугледжвае развіццё і паглыбленне прамысловай кааперацыі праз правядзенне адпаведнай прамысловай палітыкі дзяржаў Садружнасці.

Кіраўнікі ўрадаў таксама падпісалі пагадненне аб узаемадзеянні пры абмене данымі маніторынгу радыяцыйнай абстаноўкі. "Такое супрацоўніцтва дасць магчымасць аператыўна рэагаваць на змяненні параметраў радыяцыйнай абстаноўкі на прасторы СНД і забяспечыць своечасовае інфармаванне сумежных дзяржаў пры пагрозе або ўзнікненні трансгранічнага пераносу і распаўсюджвання радыеактыўных рэчываў на тэрыторыі краін Садружнасці, у тым ліку з боку трэціх дзяржаў", - адзначылі ў прэс-службе Выканкама.

На пасяджэнні былі зацверджаны пагадненне аб узаемадзеянні па пытаннях дакументавання асоб, якія падлягаюць прымусовай высылцы, пасведчаннямі на вяртанне, а таксама прыняты папраўкі ў пагадненне аб правілах вызначэння краіны паходжання тавараў у СНД ад 20 лістапада 2009 года.

Акрамя таго, быў падпісаны мемарандум аб супрацоўніцтве ў галіне процідзеяння махлярству (фроду) у сетках электрасувязі. "Дакумент прадугледжвае ўзмацненне адміністрацыйнай і крымінальнай адказнасці за такія злачынствы, супрацоўніцтва і абмен станоўчым вопытам па механізмах іх прадухілення, якія выкарыстоўваюцца, стварэнне ўмоў для ўстойлівага функцыянавання і эфектыўнага развіцця рынку паслуг міжнароднай электрасувязі ў інтарэсах канечных спажыўцоў і абароны эканамічных інтарэсаў аператараў электрасувязі, гарманізацыю нацыянальных заканадаўстваў у сферы ажыццяўлення бяспекі ў сетках электрасувязі", - растлумачылі ў прэс-службе Выканкама СНД.

Кіраўнікі ўрадаў СНД прынялі план мерапрыемстваў па рэалізацыі пагаднення аб супрацоўніцтве ў галіне абыходжання з адходамі электроннага і электратэхнічнага абсталявання на перыяд да 2030 года.

Яны таксама прынялі рашэнне аб правядзенні ў Садружнасці Незалежных Дзяржаў на рэгулярнай аснове спартакіяд сярод дзяцей з абмежаванымі магчымасцямі. Праходзіць яны будуць з перыядычнасцю адзін раз у чатыры гады, асобна па зімовых і летніх відах спорту. Першыя спаборніцтвы прапануецца правесці ў 2024 годзе па зімовых відах спорту, а ў 2026 годзе - па летніх.

Па рашэнні Савета кіраўнікоў урадаў Маладзёжнай сталіцай СНД у 2024 годзе аб'яўлены Ташкент (Узбекістан), у 2025 годзе - Габала (Азербайджан), у 2026 годзе - Капан (Арменія).

Акрамя таго, на пасяджэнні савета былі разгледжаны пытанні фінансавага забеспячэння работы органаў СНД, шэраг кадравых назначэнняў. Кіраўнікі ўрадаў зацвердзілі Даўрэна Абаева (Казахстан) на пасадзе намесніка генеральнага сакратара СНД, Сяргея Зубкова (Беларусь) на пасадзе намесніка кіраўніка Антытэрарыстычнага цэнтра дзяржаў - удзельніц Садружнасці, а таксама прадоўжылі тэрмін паўнамоцтваў намесніку кіраўніка Антытэрарыстычнага цэнтра дзяржаў - удзельніц Садружнасці Айбеку Кутманаву (Кыргызстан).

версія для друку

зрабіць стартавай

дабавіць у выбранае