Падзеі

Кіраўнік МЗС Беларусі пра важнасць перагавораў з Экватарыяльнай Гвінеяй: ёсць сур'ёзная ўзаемная цікавасць

7 верасня, Мінск /Кар. БЕЛТА/. Для Беларусі важна развіваць усебаковыя кантакты з Экватарыяльнай Гвінеяй. Гэта адзначыў карэспандэнту БЕЛТА міністр замежных спраў Беларусі Сяргей Алейнік, які ўдзельнічаў у перагаворах у Палацы Незалежнасці.

Кіраўнік знешнепалітычнага ведамства падкрэсліў, што гэты візіт з'яўляецца лагічным працягам стратэгіі па выбудоўванні адносін Беларусі з краінамі далёкай дугі, з дружалюбнымі краінамі і, вядома ж, з дзяржавамі Афрыканскага кантынента, што з'яўляецца сёння прыярытэтам.

"Афрыка - гэта кантынент будучыні, - адзначыў Сяргей Алейнік. - Мы сумесна працуем над актывізацыяй усяго комплексу двухбаковых адносін з акцэнтам перш за ўсё на эканамічным супрацоўніцтве. Ёсць сур'ёзная ўзаемная цікавасць. Ёсць вялікае жаданне развіваць эканоміку. Хачу звярнуць увагу, што эканоміка Экватарыяльнай Гвінеі сёння з'яўляецца адной з вядучых на Афрыканскім кантыненце. Пры гэтым яна на 90 працэнтаў складаецца з сыравіннага здабыўнога складніка".

Экватарыяльная Гвінея займае трэцяе месца па аб'ёмах здабычы нафты на Афрыканскім кантыненце, мае даволі развітую партовую інфраструктуру. "Для Экватарыяльнай Гвінеі важна забяспечыць інтэнсіўнае развіццё свайго сельскагаспадарчага сектара, харчовую бяспеку і стварыць больш камфортныя ўмовы для ўстойлівага эканамічнага развіцця і дабрабыту грамадзян, - адзначыў Сяргей Алейнік. - Таму нам ёсць што прапанаваць партнёрам з Экватарыяльнай Гвінеі, якія зацікаўлены вывучыць наш прамысловы патэнцыял, сельскагаспадарчыя тэхналогіі. Важным з'яўляецца абмеркаваць развіццё супрацоўніцтва ў галіне аховы здароўя, адукацыі, культуры, IT-сферы і многіх іншых".

"Ніякіх абмежаванняў няма ў плане двухбаковага парадку дня", - заўважыў міністр.

Пры гэтым кіраўнік беларускага знешнепалітычнага ведамства падкрэсліў: "Тыя сціслыя тэрміны, у якія нам удалося арганізаваць гэты візіт і ўзгадніць даволі сур'ёзны пакет двухбаковых пагадненняў, сведчыць аб вялікай узаемнай зацікаўленасці краін у прыярытэтным супрацоўніцтве".

"Гэты візіт надасць сур'ёзны імпульс і створыць трывалую аснову для далейшага паступальнага развіцця супрацоўніцтва Беларусі і Экватарыяльнай Гвінеі", - рэзюмаваў міністр замежных спраў.

версія для друку

зрабіць стартавай

дабавіць у выбранае