Падзеі

Кіраўнік беларускага МЗС і прэзідэнт Кеніі вызначылі сумесныя крокі па пашырэнні ўзаемадзеяння

Фота МЗС

3 красавіка, Мінск /Кар. БЕЛТА/. Міністр замежных спраў Рэспублікі Беларусь Сяргей Алейнік 1-3 красавіка наведаў з афіцыйным візітам Рэспубліку Кенія, паведамілі БЕЛТА ў знешнепалітычным ведамстве.

Кіраўнік беларускага МЗС быў прыняты Прэзідэнтам Рэспублікі Кенія Уільямам Рута. На перагаворах абмеркаваны ўвесь комплекс двухбаковых адносін, вызначаны сумесныя крокі па пашырэнні ўзаемадзеяння ў сферах, якія ўяўляюць узаемны інтарэс.

У ходзе перагавораў з міністрам замежных спраў і дыяспары Кеніі Альфрэдам Мутуа бакі абмеркавалі актуальныя пытанні супрацоўніцтва ў палітычнай, гандлёва-эканамічнай, навукова-тэхнічнай і культурна-гуманітарнай сферах. Міністры падкрэслілі дружалюбны характар беларуска-кенійскіх адносін, а таксама зацікаўленасць у іх умацаванні і пашырэнні напрамкаў узаемавыгаднага ўзаемадзеяння. Яны дамовіліся аб рэалізацыі канкрэтных крокаў, накіраваных на развіццё супрацоўніцтва ў сферы сельскай гаспадаркі і прамысловасці, энергетыкі і зялёнай эканомікі, адукацыі, турызму, культурных абменаў.

У гэтым кантэксце было прынята рашэнне стварыць механізм рэгулярных палітычных кансультацый паміж знешнепалітычнымі ведамствамі дзвюх краін. Адпаведны Мемарандум падпісаны па выніках сустрэчы.

Кіраўнікі МЗС Беларусі і Кеніі падкрэслілі неабходнасць падтрымання рэгулярнага дыялогу па шырокім спектры напрамкаў. Яны адзначылі супадзенне пазіцый па ключавых пытаннях міжнароднага парадку дня, пацвердзіўшы нацэленасць на далейшую ўзаемную падтрымку на шматбаковых пляцоўках.

Былі разгледжаны практычныя аспекты далейшага фарміравання дагаворна-прававой і інстытуцыянальнай базы супрацоўніцтва і пацверджана гатоўнасць да ўзгаднення і падпісання пагадненняў аб гандлёва-эканамічным супрацоўніцтве, аб супрацоўніцтве ў галіне адукацыі, аб прадухіленні двайнога падаткаабкладання, аб адмене віз для ўладальнікаў дыпламатычных і службовых пашпартоў.

У час візіту адбыліся таксама сустрэчы Сяргея Алейніка з міністрам гандлю, інвестыцый і прамысловасці Масесам Курыя, прадстаўнікамі кенійскіх дзелавых колаў.

Бакі абмеркавалі перспектывы супрацоўніцтва ў мэтах механізацыі сельскай гаспадаркі, умацавання прамысловага патэнцыялу Кеніі, пашырэння ўзаемнага гандлю і прамысловай кааперацыі.

версія для друку

зрабіць стартавай

дабавіць у выбранае