Падзеі

Карпенка: ёсць чатыры магчымыя даты правядзення прэзідэнцкіх выбараў у Беларусі

10 верасня, Мінск /Кар. БЕЛТА/. Ёсць чатыры магчымыя даты правядзення прэзідэнцкіх выбараў у Беларусі ў 2025 годзе. Аб гэтым пасля нарады ў Прэзідэнта заявіў журналістам старшыня ЦВК Беларусі Ігар Карпенка, перадае карэспандэнт БЕЛТА.

"У адпаведнасці з заканадаўствам гэтыя выбары павінны прайсці не пазней за 20 ліпеня. Разам з тым дэпутацкі корпус прымае рашэнні - Палата прадстаўнікоў нацыянальнага сходу. Мы пасля адкрыцця сесіі 17 верасня з дэпутатамі правядзём шэраг кансультацый. Не буду скрываць, называюцца чатыры даты магчымага правядзення выбараў Прэзідэнта. Але для таго каб іх агучваць, трэба правесці кансультацыі. І зразумела, што рашэнне будзе прымаць Палата прадстаўнікоў на сваім пасяджэнні", - сказаў кіраўнік ЦВК.

Што датычыцца розных інсінуацый у інтэрнэце адносна даты маючых адбыцца выбараў, Ігар Карпенка адзначыў, што гэта не новая тэма. "Праблема электаральнага суверэнітэту і неўмяшання ў выбарчы працэс - гэта тэма не толькі для нас актуальная. Яна актуальная ўсюды", - падкрэсліў ён.

Напрыклад, кіраўнік ЦВК згадаў аб нядаўніх атаках хакераў на платформу для электроннага галасавання ў Расіі. "Паўстае пытанне, навошта звонку ўмешваецеся ў гэты працэс? Ну ідзе там электроннае галасаванне. Вам якая розніца, як людзі галасуюць? Людзі галасуюць у сваёй краіне, праводзяць у сваёй краіне выбары, - заўважыў ён. - На жаль, сёння ёсць шэраг буйных геапалітычных ігракоў, якія лічаць, што выбары трэба выкарыстаць у сваіх мэтах. Мы ж лічым дакладна і зразумела, што выбары праводзяцца ў нашай краіне для нашага народа, у нашых нацыянальных інтарэсах з мэтай забеспячэння суверэнітэту і незалежнасці нашай краіны. І мы будзем самі вызначаць, хто ў нас будзе ў парламенце, хто будзе прэзідэнтам, хто будзе дэпутатам мясцовых Саветаў. Мы, беларускі народ, будзем гэта рабіць".

Ігар Карпенка заявіў, што ЦВК гатова да любой з прапануемых дат, якія агучваліся для правядзення выбараў. "Мы падрыхтавалі ўжо адпаведныя метадычныя рэкамендацыі, інфармацыйную базу. Цяпер адпрацоўваем візуальную канцэпцыю магчымага афармлення да выбараў участкаў, плакатаў - усяго таго інфармацыйнага антуражу, які мы звычайна прымяняем да выбараў", - дадаў старшыня ЦВК.

На нарадзе ў Прэзідэнта таксама абмяркоўвалася пытанне запрашэння міжнародных наглядальнікаў. "Закраналі шырокі спектр арганізацый, якія могуць быць запрошаны, а не толькі СНД і ШАС (місіі наглядальнікаў ад гэтых аб'яднанняў. - Заўвага БЕЛТА), якія ў нас традыцыйна прысутнічалі ў адзіны дзень галасавання. Таму ідзе планавая работа", - падзяліўся Ігар Карпенка.

"ЦВК адкрыта для ўзаемадзеяння з усімі суб'ектамі, якія завязаны на выбарчы працэс. Гэта не толькі сістэма камісій. Гэта яшчэ і органы мясцовай улады, якія павінны ўважліва паглядзець, дзе размяшчаюцца ўчасткі, ці зручныя яны для падыходу, пад'езду, якія там створаны ўмовы, адпаведнасць абсталявання (неабходна праверыць. - Заўвага БЕЛТА) і гэтак далей. Гэтыя пытанні таксама сёння былі ў полі зроку кіраўніка дзяржавы", - рэзюмаваў кіраўнік ЦВК.

версія для друку

зрабіць стартавай

дабавіць у выбранае