Падзеі

22 верасня, Мінск /Кар. БЕЛТА/. Намеснік прэм'ер-міністра Беларусі Анатоль Калінін 21 верасня сустрэўся з прадстаўніком Дзіцячага фонду ААН (ЮНІСЕФ) у Беларусі Рашэдам Мустафой Сарварам. Абмяркоўваліся актуальныя пытанні ўзаемадзеяння з фондам, паведамілі БЕЛТА ў прэс-службе беларускага ўрада.

Асобна ў час сустрэчы разгледжаны магчымыя праекты супрацоўніцтва ЮНІСЕФ з транспартным сектарам Беларусі. Анатоль Калінін заявіў, што прапановы ЮНІСЕФ па партнёрстве ў гэтым напрамку будуць прапрацаваны ўсімі зацікаўленымі. "У сваю чаргу Рашэд Мустафа Сарвар адзначыў, што 24 працэнты беларусаў прымаюць удзел у дабрачыннай дзейнасці. Анатоль Калінін прапанаваў разгледзець магчымасць стварэння платформы для развіцця культуры дабрачыннасці ў Беларусі", - расказалі ў прэс-службе.

Віцэ-прэм'ер канстатаваў, што дасягнуты высокі ўзровень супрацоўніцтва з ЮНІСЕФ. Падтрымка моладзі і дзяцей - адзін з важнейшых прыярытэтаў сацыяльна-эканамічнага развіцця Беларусі на бягучае пяцігоддзе, якому традыцыйна ўдзяляецца асаблівая ўвага на вышэйшым узроўні.

У адпаведнасці з краінавай праграмай супрацоўніцтва ўрада Беларусі і ЮНІСЕФ на 2016-2020 гады асноўныя прыярытэты дзейнасці фонду - стварэнне бяспечнага і падтрымліваючага асяроддзя для дзіцяці, рэалізацыя правоў дзяцей з асаблівасцямі псіхафізічнага развіцця і інваліднасцю, стварэнне спрыяльнага асяроддзя для зніжэння неабароненасці падлеткаў і іх паўнацэннага ўдзелу ў прыняцці рашэнняў. "Упэўнены, што рэалізацыя мер у рамках праграмы будзе садзейнічаць выкананню Нацыянальнай стратэгіі ўстойлівага сацыяльна-эканамічнага развіцця Беларусі да 2030 года, дзяржаўнай праграмы "Здароўе народа і дэмаграфічная бяспека" на 2016-2020 гады, Нацыянальнага плана дзеянняў па забеспячэнні гендарнай роўнасці на 2016-2020 гады і іншых. Удзячны фонду за падтрымку, што аказваецца намаганням урада па ўмацаванні ўзаемадзеяння паміж сістэмамі адукацыі, аховы здароўя, сацыяльнай абароны і праваахоўнымі органамі", - падкрэсліў Анатоль Калінін.

Віцэ-прэм'ер асабліва адзначыў інавацыйнасць і шырокі спектр выкарыстоўваемых інструментаў супрацоўніцтва ЮНІСЕФ і Беларусі.