Падзеі

"Каб кожны год не стаяць на каленях" - Лукашэнка растлумачыў, навошта Беларусь купляе нафту ў іншых краінах

14 лютага, Светлагорск /Кар. БЕЛТА/. Беларусь прадоўжыць закупляць нафту ў іншых краінах, нават калі яна будзе даражэйшая за расійскую. Аб гэтым Прэзідэнт Беларусі Аляксандр Лукашэнка заявіў сёння на сустрэчы з калектывам Светлагорскага ЦКК, перадае карэспандэнт БЕЛТА.

У час перагавораў у Сочы Прэзідэнт Расіі Уладзімір Пуцін засумняваўся, навошта беларускаму боку купляць нафту ў іншых краінах. " Навошта вы будзеце гэта рабіць, калі яна ўсё роўна даражэйшая за расійскую?" - спытаў ён.

Аляксандр Лукашэнка заявіў, што Беларусь прадоўжыць дыверсіфікаваць закупкі. "Каб кожны год 31 снежня ў дванаццаць гадзін ночы не стаяць на каленях, - растлумачыў кіраўнік дзяржавы. - Так быць не павінна, і так не будзе".

Прэзідэнт падкрэсліў, што Беларусь не будзе плаціць прэміі расійскім нафтавым кампаніям, тым больш калі яны пастаўляюць прадукт па сусветнай цане. "Мы не просім танную нафту. Мы купім па сусветнай цане і перапрацуем. І гэта выгадна для кампаній", - заявіў ён.

"У Сочы мы дамовіліся, што ўрад Расіі і асабіста намеснік кіраўніка Адміністрацыі Дзмітрый Козак будуць кантраляваць гэта пытанне і дапамогуць нам дамовіцца. Гэта значыць, пайшоў сігнал: калі Беларусь з кім-небудзь дамаўляецца, дапамажыце па трубе ім паставіць гэту нафту з Расіі. Я нікога не шантажыраваў, сказаў: калі з Расіі не будзе пастаўлена нафта ў патрэбных аб'ёмах (у студзені яны паставілі ўсяго 500 тыс. т - 1,5 млн т недапаставілі), мы пачнём адбор і з транзітнай трубы. Праз краіну на Захад і для Беларусі прапампоўваецца 70 млн т нафты. І яны не маюць ніякіх праблем. Мы добрасумленна пампуем гэту нафту. Памятаеце летам брудную нафту? Да цяперашняга часу не разлічыліся за гэта, хоць у нас выйшла са строю абсталяванне ў Мазыры, Наваполацк пацярпеў і нафтаправод "Дружба". Таму, калі не паставяць у лютым, будзем да 2 млн т дабіраць", - папярэдзіў Аляксандр Лукашэнка.

Акрамя таго, паводле яго слоў, Беларусь прапрацоўвае пытанне паставак нафты з ЕС рэверсам па адной з ветак нафтаправода "Дружба". "Мы цяпер з Гданьска (купім у Саудаўскай Аравіі, Эміратаў, Злучаных Штатаў Амерыкі) паставім па трубе", - расказаў Прэзідэнт. Тады ўжо не Расія будзе па ім пастаўляць нафту на Захад, а Беларусь пампаваць з Еўропы.

Для паставак таксама задзейнічаюць балтыйскія парты. Тут могуць аказаць садзейнічанне Злучаныя Штаты. "Я прыбалтам прапаную: мы можам купіць нафту на Балтыцы, запампаваць праз Літву або Латвію (як дамовімся), перапрацуем і забяспечым увесь прыбалтыйскі рэгіён", - раскрыў схему Наваполацкага НПЗ кіраўнік дзяржавы. Такім жа чынам зможа працаваць і завод у Мазыры: нафта да яго паступіць праз Чорнае мора, а прадпрыемства потым забяспечыць сваёй прадукцыяй Украіну і часткова краіны Еўрасаюза.

Адказваючы на заўвагі з расійскага боку адносна дарагоўлі такіх падыходаў, Аляксандр Лукашэнка нагадаў, што ў свой час яны выдзелілі дзясяткі мільярдаў долараў на будаўніцтва Турэцкага і Паўночнага патокаў. Хоць маглі значна танней пастаўляць газ праз Украіну, нават прыняўшы дадатковыя ўмовы Кіева. Але ў Расіі заявілі, што на гэта ніколі не пойдуць з прынцыпу, і вырашылі будаваць газаправоды ў абход гэтай краіны. "Гэтак жа і я кажу "не". Мы будзем па гэтых маршрутах прапрацоўваць альтэрнатыўныя пастаўкі нафты", - дадаў Прэзідэнт. - Мы адкрыта, сумленна гаворым аб гэтай лагістыцы".

У цэлым нядаўнія перагаворы ў Сочы Аляксандр Лукашэнка ахарактарызаваў як "строгую і адкрытую размову". "Па нафце, як мы і прасілі, - сусветная цана без усялякіх прэмій. Без усялякіх скідак, нам не патрэбны ніякія скідкі", - заявіў кіраўнік дзяржавы.

версія для друку

зрабіць стартавай

дабавіць у выбранае