Падзеі

Яшчэ адна афрыканская краіна зацікавілася беларускім вопытам у сельскай гаспадарцы

Фота МЗС Беларусі

20 верасня, Мінск /Кар. БЕЛТА/. Міністр замежных спраў Сяргей Алейнік на палях 78-й сесіі Генеральнай Асамблеі ААН у Нью-Ёрку правёў сустрэчу з міністрам замежных спраў і міжнароднага супрацоўніцтва Сьера-Леонэ Цімаці Мусой Кабам. Аб гэтым БЕЛТА паведамілі ў прэс-службе МЗС Беларусі.

Сустрэча прайшла напярэдадні 20-й гадавіны ўстанаўлення дыпламатычных адносін, якую краіны адсвяткуюць 27 верасня. "У развіццё размовы, якая адбылася на палях саміту БРІКС у Іаханесбургу, кіраўнікі знешнепалітычных ведамстваў пацвердзілі ўзаемную зацікаўленасць у развіцці палітычнага дыялогу, нарошчванні гандлёва-эканамічнага супрацоўніцтва і актывізацыі двухбаковага ўзаемадзеяння ў сферы прамысловасці, сельскай гаспадаркі, энергетыкі, аховы здароўя і адукацыі. Цімаці Муса Каба падкрэсліў асаблівы інтарэс, які ўяўляе для яго краіны беларускі вопыт развіцця сельскай гаспадаркі", - адзначылі ў міністэрстве.

Міністр Сьера-Леонэ таксама праінфармаваў аб унутрыпалітычнай сітуацыі ў яго краіне і афрыканскім рэгіёне ў цэлым. Сяргей Алейнік пацвердзіў гатоўнасць Беларусі да прадметнага абмеркавання ўсіх напрамкаў узаемадзеяння і запрасіў свайго калегу наведаць з візітам нашу краіну. Бакі дамовіліся аб сумеснай рабоце над шэрагам двухбаковых пагадненняў, якія створаць дагаворна-прававую аснову для далейшага ўзаемадзеяння ў гандлёва-эканамічнай, гуманітарнай і іншых сферах.

У Нью-Ёрку 19 верасня беларуская дэлегацыя прыняла ўдзел у пасяджэнні высокага ўзроўню па выніках супрацоўніцтва ў рамках Ініцыятывы глабальнага развіцця. Міністр замежных спраў Сяргей Алейнік пацвердзіў прыхільнасць Беларусі да ўстойлівага развіцця і гатоўнасць да ўзаемадзеяння ў рамках ініцыятывы. Ён выказаў надзею, што ініцыятыва дапаможа ўстараніць незаконную практыку прымянення аднабаковых прымусовых мер, якія перашкаджаюць выкараненню беднасці, забеспячэнню харчовай бяспекі і закранаюць многія іншыя напрамкі МУР.

Беларускі дыпламат таксама сустрэўся з пакістанскім калегам Джалілем Абасам Джылані. "Асноўная ўвага была ўдзелена пытанням прамысловай кааперацыі і інтэнсіфікацыі двухбаковага гандлёва-эканамічнага супрацоўніцтва. У гэтым кантэксце абмеркавалі падрыхтоўку дарожнай карты па нарошчванні тавараабароту паміж Беларуссю і Пакістанам. У сувязі з гэтым дасягнуты дамоўленасці па графіку бліжэйшых двухбаковых кантактаў на розных узроўнях", - расказалі ў прэс-службе МЗС.

Таксама абмеркаваны перспектывы развіцця супрацоўніцтва паміж парламентамі Беларусі і Пакістана і ўзаемадзеянне бакоў на міжнароднай арэне, уключаючы Шанхайскую арганізацыю супрацоўніцтва.

На палях сесіі Генасамблеі таксама адбыўся сціслы абмен думкамі Сяргея Алейніка з намеснікам старшыні ўрада Расіі Аляксеем Аверчуком і міністрам замежных спраў Егіпта Самехам Шукры.

версія для друку

зрабіць стартавай

дабавіць у выбранае