Падзеі
Галоўчанка сустрэўся з Прэзідэнтам Казахстана
25 лютага, Нур-Султан /Кар. БЕЛТА/. Прэзідэнт Казахстана Касым-Жамарт Такаеў сустрэўся з кіраўнікамі дэлегацый - удзельніц пасяджэння Еўразійскага міжурадавага савета. Беларускую дэлегацыю ўзначальвае прэм'ер-міністр Раман Галоўчанка, перадае карэспандэнт БЕЛТА.
"Упэўнены, што далейшае ўмацаванне інтэграцыі на еўразійскай прасторы - магутны стымул для развіцця і працвітання нашых дзяржаў. Статыстычныя даныя выразна сведчаць аб траекторыі росту ЕАЭС. Аб'ём узаемнага гандлю складае $72 млрд, гэта вельмі вялікая лічба. Вядома ж, не магу не адзначыць вялікі ўклад Казахстана ў інтэграцыйныя працэсы. Думаю, што нашы вынікі ў бягучым годзе павінны быць не менш значныя, нягледзячы на вельмі неспакойную і турбулентную сітуацыю, бесперапынны санкцыйны націск на краіны саюза. Вельмі важна, каб мы забяспечвалі ўласную прамысловую і энергетычную бяспеку і не залежалі ад імпарту", - сказаў Раман Галоўчанка.
Сустрэча прайшла перад пасяджэннем Еўразійскага міжурадавага савета ў пашыраным складзе.
Паводле даных прэс-службы ЕЭК, кіраўнікі ўрадаў дзяржаў ЕАЭС на пасяджэнні Еўразійскага міжурадавага савета абмяркуюць рэалізацыю пагаднення аб механізме прасочвальнасці тавараў, увезеных на мытную тэрыторыю ЕАЭС, і пагадненні аб прымяненні ў ЕАЭС навігацыйных пломбаў для сачэння за перавозкамі. Плануецца таксама разгледзець дарожную карту па пашырэнні прамысловага супрацоўніцтва ў галіне грамадзянскага авіябудавання ў краінах саюза на 2022-2023 гады, даклад аб бягучым стане і перспектывах развіцця інтэграванай інфармацыйнай сістэмы ЕАЭС.
Акрамя таго, на парадку дня абмеркаванне сумеснага праекта дзяржаў - членаў ЕАЭС па ажыццяўленні паскораных кантэйнерных чыгуначных і мультымадальных перавозак сельгаспрадукцыі "Еўразійскі аграэкспрэс", змяненняў у Дагавор аб ЕАЭС у частцы парадку спагнання ўскосных падаткаў пры электронным гандлі таварамі, што рэалізуюцца фізічным асобам, а таксама ўдзелу Узбекістана ў асобных ініцыятывах ЕАЭС.
версія для друку
зрабіць стартавай
дабавіць у выбранае