Падзеі

Галоўчанка прадставіць Беларусь на саміце "Усходняга партнёрства"

Раман Галоўчанка. Фота з архіва

18 чэрвеня, Мінск /Кар. БЕЛТА/. Прэм'ер-міністр Беларусі Раман Галоўчанка будзе прадстаўляць Беларусь на саміце ініцыятывы ЕС "Усходняе партнёрства", які адбудзецца сёння ў рэжыме відэаканферэнцыі. Гэту інфармацыю карэспандэнту БЕЛТА пацвердзіла прэс-сакратар кіраўніка беларускага ўрада Аляксандра Ісаева.

Напярэдадні саміту адбылася тэлефонная размова міністра замежных спраў Уладзіміра Макея з еўрапейскім камісарам па пытаннях суседства і пашырэння ЕС Оліверам Вархеі. Як паведамілі ў прэс-службе МЗС, дыпламаты абмеркавалі вынікі праведзенай 11 чэрвеня віртуальнай сустрэчы міністраў замежных спраў дзяржаў - удзельніц "Усходняга партнёрства" і падрыхтоўку да маючай адбыцца відэаканферэнцыі кіраўнікоў дзяржаў і ўрадаў. "Бакі абмяняліся таксама меркаваннямі па шырокім спектры актуальных пытанняў беларуска-еўрапейскага ўзаемадзеяння", - дадалі ў міністэрстве.

Напярэдадні відэаканферэнцыі кіраўнікоў дзяржаў і ўрадаў праект "Усходняе суседства ЕС", які фінансуецца Еўрапейскім саюзам, апублікаваў вынікі апытання грамадскай думкі ў шасці краінах "Усходняга партнёрства": Арменіі, Азербайджане, Беларусі, Грузіі, Малдове і Украіне. Палявая частка даследавання праводзілася ў лютым-сакавіку і была заснавана на асабістых інтэрв'ю сярод рэпрэзентатыўнай выбаркі з адной тысячы чалавек на краіну.

Па выніках даследавання, 38 працэнтаў апытаных беларусаў пазітыўна адносяцца да Еўрасаюза, 46 працэнтаў - нейтральна, 12 працэнтаў - негатыўна, 4 працэнты не ведаюць або ніколі не чулі пра ЕС. Добрымі адносіны паміж Беларуссю і ЕС лічаць 54 працэнты рэспандэнтаў, 45 працэнтаў апытаных давяраюць ЕС - гэта крыху больш, чым Еўразійскаму эканамічнаму саюзу (39 працэнтаў). 41 працэнт беларусаў ведае аб падтрымцы ЕС, з іх 52 працэнты лічаць яе эфектыўнай.

"Усходняе партнёрства" аб'ядноўвае ЕС і шэсць постсавецкіх краін: Азербайджан, Арменію, Беларусь, Грузію, Малдову і Украіну. Гэта праграма накіравана на палітычную асацыяцыю і эканамічную інтэграцыю з Еўрасаюзам.

версія для друку

зрабіць стартавай

дабавіць у выбранае