Падзеі
Галоўчанка: Беларусі і Кубе трэба сумесна адстойваць нацыянальны суверэнітэт і права вызначаць сваё развіццё
17 ліпеня, Мінск /Кар. БЕЛТА/. Беларусі і Кубе трэба сумесна адстойваць нацыянальны суверэнітэт і права вызначаць сваё развіццё. Аб гэтым заявіў прэм'ер-міністр Беларусі Раман Галоўчанка ў час сустрэчы з намеснікам старшыні Нацыянальнай асамблеі народнай улады Кубы Анай Марыяй Мары Мачада, перадае карэспандэнт БЕЛТА.
"Ёсць пэўны сімвалізм у тым, што афіцыйныя сустрэчы на кубінскай зямлі пачынаюцца менавіта з вас - прадстаўніка Нацыянальнай асамблеі народнай улады Кубы. У абедзвюх нашых краінах уся ўлада належыць народу, а парламент - галоўнае сувязнае звяно паміж грамадствам і дзяржавай. Паміж Беларуссю і Кубай склаліся выключна дружалюбныя адносіны, якія прайшлі праверку часам і сталі яскравым прыкладам таго, як павінны выбудоўвацца міждзяржаўныя адносіны ў сучасным свеце. Гэта асабліва важна цяпер, калі сусветная сітуацыя становіцца ўсё больш напружанай, турбулентнай і нават небяспечнай", - сказаў Раман Галоўчанка.
Ён нагадаў аб падзеях Карыбскага крызісу. "Тады лідары СССР і ЗША знайшлі ў сабе мужнасць і палітычную волю зрабіць крокі, якія далі магчымасць пазбегнуць буйнога сусветнага канфлікту. На жаль, цяпер мы пакуль не бачым такой палітычнай мудрасці і волі зберагчы самае каштоўнае, што ёсць на планеце, - мір. Заходнімі краінамі раздуваюцца і падтрымліваюцца канфлікты па ўсёй планеце. Адзін з самых вострых цяпер каля нашых граніц. У такія складаныя моманты неабходна яшчэ больш аб'яднацца і сумесна адстойваць наш нацыянальны суверэнітэт і права самастойна вызначаць наша развіццё", - адзначыў прэм'ер-міністр.
"Можаце разлічваць на тое, што Беларусь ніколі не зменіць сваю пазіцыю аб непрымальнасці гандлёвай, эканамічнай і фінансавай блакады, якая ўведзена ЗША супраць Кубы. Як вы ведаеце, Беларусь цяпер таксама адчувае сур'ёзны знешні націск - санкцыйны, палітычны. Я разважаў аб тым, чаму заходнія краіны так актыўна карыстаюцца гэтым інструментам санкцый і абмежаванняў. І для сябе знайшоў вельмі просты адказ - яны нас проста баяцца", - падкрэсліў кіраўнік беларускага ўрада.
Старшыня Нацыянальнай асамблеі народнай улады краіны Хуан Эстэбан Ласа Эрнандэс зайшоў павітаць Рамана Галоўчанку. "Я цяпер праводжу пасяджэнне асамблеі. Абмяркоўваем з усімі дэпутатамі праект закона аб дзяржаўных прадпрыемствах. Амаль год гэты закон знаходзіцца на разглядзе ў парламента. Мы вельмі рады вашаму візіту. Я адпрасіўся на мінуту з пасяджэння асамблеі, каб павітаць вас, Раман Аляксандравіч", - сказаў ён.
Кіраўнік беларускага ўрада падзяліўся сваім меркаваннем адносна законапраекта, які цяпер разглядаюць кубінскія дэпутаты. "Вы вельмі важную тэму абмяркоўваеце цяпер на пасяджэнні асамблеі. Калі хочаце маё меркаванне, можна і трэба даваць дзяржаўным прадпрыемствам больш свабоды дзеянняў. Не страчваючы дзяржаўны кантроль, развязаць рукі кіраўніцтву прадпрыемстваў, каб яны вучыліся прымаць самастойныя рашэнні. Мы прайшлі гэты шлях. Галоўны рэзультат - гэта грошы, якія прадпрыемствы прыносяць краіне", - звярнуў увагу прэм'ер-міністр.
версія для друку
зрабіць стартавай
дабавіць у выбранае