Падзеі

Галоўчанка: Беларусь і Кітай рыхтуюць пакет пагадненняў і дамоўленасцей у эканамічнай сферы

14 жніўня, Мінск /Кар. БЕЛТА/. Беларусь і Кітай рыхтуюць пакет пагадненняў і дамоўленасцей у эканамічнай сферы. Аб гэтым заявіў прэм'ер-міністр Беларусі Раман Галоўчанка ў час сустрэчы са старшынёй Дзяржаўнага агенцтва па міжнародным развіцці і супрацоўніцтве КНР Ло Чжаахуэем, перадае карэспандэнт БЕЛТА.

"Вітаю вас ва ўрадзе Беларусі, на гасціннай беларускай зямлі. Чуў самыя пахвальныя водзывы аб рабоце вашага агенцтва, вашым прафесіяналізме ад членаў урада нашай краіны і ў прыватнасці ад міністра замежных спраў Беларусі. Вельмі важна, што вы прыехалі напярэдадні візіту ў Беларусь прэм'ера Дзяржсавета КНР Лі Цяна. Як мяне інфармавалі, вы прыбылі ў Беларусь з добрымі навінамі. Гэта дае нам магчымасць якасна падрыхтаваць эканамічны пакет дамоўленасцей да сустрэчы з маім паважаным калегам", - сказаў Раман Галоўчанка.

Ён адзначыў, што Беларусь і Кітай разглядаюць бягучы этап адносін як вельмі важны. "У першую чаргу таму, што новы статус адносін нашых краін, які зафіксавалі кіраўнікі дзяржаў у мінулым годзе, урады павінны напоўніць новым эканамічным зместам. Беларускім і кітайскім бакамі падрыхтаваны вялікі пакет пагадненняў і дамоўленасцей для падпісання. Мы лічым, што гэтыя дакументы замацуюць планы перспектыўнага партнёрства Беларусі і Кітая па ключавых напрамках нашага супрацоўніцтва, якімі з'яўляюцца эканоміка, гандаль, прамысловая і тэхналагічная кааперацыя, навука, адукацыя, транспарт, лічбавае развіццё, зялёная эканоміка і рэгіянальнае супрацоўніцтва", - падкрэсліў прэм'ер-міністр.

Раман Галоўчанка дадаў, што ўрад КНР падтрымаў прапанову беларускага боку прысвяціць чарговы тэматычны год супрацоўніцтву ў галіне навукі, тэхналогій і інавацый.

"Беларусь асабліва зацікаўлена ў тым, каб у ходзе маючага адбыцца візіту прэм'ера Дзяржсавета КНР падпісаць дэталізаваны план па спалучэнні прамысловай палітыкі нашых краін у рамках рэалізацыі комплекснай стратэгіі сумеснага прамысловага развіцця. Мы лічым, што менавіта гэты план павінен стаць праграмным дакументам, які напоўніць канкрэтным практычным зместам новы статус нашых адносін - статус усепагоднага і ўсебаковага стратэгічнага партнёрства", - заявіў Раман Галоўчанка.

"Нягледзячы на складаныя геапалітычныя ўмовы, сусветную турбулентнасць, міжнародную нестабільнасць, двухбаковыя кантакты Беларусі і Кітая развіваюцца па ўзыходнай. Лічу, што вялікі ўклад у гэта ўносіць ваша асабістая падтрымка і работа ўсіх супрацоўнікаў вашага агенцтва па пашырэнні важнейшых праектаў беларуска-кітайскага супрацоўніцтва", - рэзюмаваў кіраўнік урада.

версія для друку

зрабіць стартавай

дабавіць у выбранае