Падзеі

Дэпутаты падтрымалі папраўкі ў законапраект аб сацнарматывах і мінімальнай заработнай плаце

16 снежня, Мінск /Кар. БЕЛТА/. Дэпутаты на пасяджэнні чацвёртай сесіі Палаты прадстаўнікоў Нацыянальнага сходу сёмага склікання прынялі ў першым чытанні законапраект "Аб змяненні законаў" (па пытаннях сацыяльных нарматываў і мінімальнай заработнай платы), перадае карэспандэнт БЕЛТА.

Законапраект унесены ў Палату прадстаўнікоў 1 кастрычніка гэтага года Саветам Міністраў. "Ён падрыхтаваны для пераходу на адзіны сацыяльны нарматыў (крытэрый) пры фарміраванні і рэалізацыі дзяржаўнай палітыкі рэгулявання ўзроўню жыцця, а таксама пры ажыццяўленні мер сацыяльнай абароны насельніцтва краіны", - адзначыў намеснік старшыні Пастаяннай камісіі па працы і сацыяльных пытаннях Палаты прадстаўнікоў Алег Семянчук.

Законапраект карэкціруе паняцце "асноўныя сацыяльна-дэмаграфічныя групы насельніцтва", назначэнне, парадак устанаўлення і перагляду бюджэту пражытачнага мінімуму, пашырае сферу прымянення бюджэту пражытачнага мінімуму ў частцы ўдакладнення яго выкарыстання пры ўстанаўленні мінімальных дзяржаўных сацыяльна-працоўных гарантый, а таксама мінімальнага памеру аліментаў і іншых выплат, прадугледжаных актамі заканадаўства, не звязаных з мінімальнымі дзяржаўнымі сацыяльна-працоўнымі гарантыямі. Вызначаецца таксама парадак устанаўлення памеру месячнай мінімальнай заработнай платы.

"Праектам прадугледжваецца выключыць мінімальны спажывецкі бюджэт і ўстанавіць усе выплаты, іншыя гарантыі дзяржавы, а таксама крытэрыі аказання дзяржаўнай падтрымкі насельніцтву з улікам бюджэту пражытачнага мінімуму і сацыяльна-дэмаграфічных груп. Закон становіцца больш зразумелым для насельніцтва, таму што для простага чалавека не заўсёды ясна, што такое бюджэт пражытачнага мінімуму, мінімальныя спажывецкія бюджэты", - адзначыў парламентарый.

Акрамя таго, з пераліку сацыяльна-дэмаграфічных груп прапануецца выключыць групу "студэнты". "Мы не ўшчамляе іх правы. Сёння студэнты даволі рознаўзроставая група. Атрымаўшы сярэднюю спецыяльную адукацыю, можна ў любым узросце атрымаць вышэйшую. Сёння студэнты маюць права працаваць, асабліва тыя, хто атрымлівае адукацыю ў завочнай і вячэрняй форме навучання. Кожнага студэнта трэба разглядаць індывідуальна, ці гэта дзіця-сірата, інвалід, ці ён належыць да любой іншай катэгорыі, якая патрабуе сацыяльнай абароны, і мы павінны ў гэтым плане працаваць", - дадаў Алег Семянчук.

Таксама ўносіцца новы механізм разліку і зацвярджэння мінімальнай заработнай платы. "Прадугледжваецца яе ўстанаўліваць не ніжэй за 30 працэнтаў ад прагназуемага ўзроўню намінальнай заработнай платы на наступны год па рэспубліцы. Ён устанаўліваецца прагнозам сацыяльна-эканамічнага развіцця. Бюджэт пражытачнага мінімуму, яго структура і змест разлічваюцца і зацвярджаюцца раз у пяць гадоў, прапануецца тэрмін скараціць да трох гадоў, каб была больш актуальнай яго структура, каб улічваць бягучыя запыты насельніцтва", - рэзюмаваў парламентарый.

версія для друку

зрабіць стартавай

дабавіць у выбранае