Падзеі

Бельскі: рэалізацыя Мэт устойлівага развіцця - аснова ўсеагульнага прагрэсу і працвітання

Фота з архiва

8 жніўня, Мінск /Кар. БЕЛТА/. Рэалізацыя Мэт устойлівага развіцця - аснова ўсеагульнага прагрэсу і працвітання. Аб гэтым заявіў БЕЛТА нацыянальны каардынатар па дасягненні Мэт устойлівага развіцця, намеснік старшыні Савета Рэспублікі прафесар Валерый Бельскі.

"Напярэдадні саміту па Мэтах устойлівага развіцця, які адбудзецца 18-19 верасня ў Нью-Ёрку, Сакратарыят ААН і асабіста генеральны сакратар Антоніу Гутэрыш прыкладаюць намаганні, каб ажывіць работу ў рамках глабальнага парадку дня. Агульны лейтматыў - забяспечыць як мінімум выкананне дэкларуемых параметраў да 2030 года, улічваючы, што дасягненне многіх мэт адстае ад графіка, а таксама дабіцца прыняцця сусветнымі лідарамі больш амбіцыйных планаў, рэфармаваць сістэму рэгістрацыі нацыянальных і глабальных абавязацельстваў, узмацніць маніторынг і кантроль іх выканання. У рамках падрыхтоўкі да саміту апублікавана папярэдняя версія даклада генеральнага сакратара ААН, прапануюцца рэкамендацыі для паскарэння выканання МУР. Акцэнт зроблены на кліматычным парадку дня, захаванні біяразнастайнасці, пераадоленні беднасці і няроўнасці, у тым ліку за кошт мабілізацыі рэсурсаў для дапамогі маючым патрэбу краінам", - расказаў Валерый Бельскі.

У лік ключавых тэм таксама ўнесены праблемы прымянення аднабаковых прымусовых мер, якія істотна стрымліваюць дынаміку дасягнення МУР шэрагам краін сусветнай супольнасці, у тым ліку Беларуссю і яе гандлёвымі партнёрамі. "У адпаведнасці са Статутам ААН санкцыі могуць уводзіцца па рашэнні Савета Бяспекі арганізацыі. Гэта юрыдычна абавязваючая норма. Але ЗША і іх саюзнікі не лічаць неабходным яе выконваць. З-за абмежаванняў у сферы разлікаў Беларусь не можа правесці нават свой членскі ўзнос у ААН. Такая практыка павінна атрымаць адпаведную міжнародную ацэнку. Таму Беларусь мае намер засяродзіць увагу на пытанні неправамернасці санкцый і іх шкоды для дасягнення МУР, пра што праінфармаваны офіс пастаяннага каардынатара ААН у Беларусі", - адзначыў нацыянальны каардынатар.

"Наша краіна з'яўляецца адным з сусветных лідараў у пашырэнні Глабальнага парадку дня. Нацыянальная стратэгія ўстойлівага развіцця, якая распрацоўваецца на 15-гадовую перспектыву, карэлюе з МУР, уваходзіць у сістэму планавання і прагназавання Беларусі. Адладжана архітэктура інстытутаў устойлівага развіцця і забяспечваецца цеснае ўзаемадзеянне са структурамі ААН. Прагрэс па ключавых паказчыках Мэт наблізіўся да 80 працэнтаў, і няма сумненняў, што ўсе намечаныя і перспектыўныя задачы будуць выкананы. Агульнапрызнана, што Беларусь - донар сусветнай харчовай бяспекі, паколькі выступае адным з буйнейшых пастаўшчыкоў угнаенняў і малочных прадуктаў. Краіна вызначаецца намаганнямі ў галіне аховы здароўя, асабліва аховы мацярынства і дзяцінства, пераадолення няроўнасці ў даходах, у тым ліку ў рэгіянальным разрэзе. Характэрна, што нават асобныя ўніверсальныя паказчыкі развіцця, па якіх ААН падводзіць вынікі работы, успрымаюцца ў Беларусі вельмі экзатычнымі, напрыклад, адносна гарадскіх трушчоб, - падкрэсліў Валерый Бельскі. - Мы гатовы дзяліцца вопытам і запрашаем да супрацоўніцтва зацікаўленыя бакі, хоць па-ранейшаму ў асобных сферах самі разлічваем на міжнародную дапамогу. Гэта перш за ўсё пераадоленне наступстваў катастрофы на Чарнобыльскай АЭС".

Больш таго, Беларусь актыўна садзейнічае мірнаму працэсу ў рэгіёне. "На нашай тэрыторыі праведзены рэзультатыўныя перагаворы па ўрэгуляванні крызісу ва Украіне пасля вядомых падзей 2014 года і пачала СВА ў 2022 годзе. Беларускія ініцыятывы ў ААН вызначаюць парадак дня ў барацьбе з гандлем людзьмі, міжнародны рэзананс маюць нашы намаганні па захаванні гістарычнай памяці, процідзеянні рэабілітацыі нацызму. Мы лічым важнейшай задачай аб'яднанне сусветнай супольнасці для рэалізацыі Мэт устойлівага развіцця як асновы ўсеагульнага прагрэсу і працвітання, нягледзячы на прафанацыю і дыскрэдытацыю гэтай работы з боку асобных краін, якія адыгрываюць значную ролю ў міжнародных адносінах. Бо нашы каштоўнасці не дазваляюць заставацца абыякавымі да бед і пакут людзей, пазбаўленых часта самага неабходнага - ежы, прытулку, сучаснай медыцынскай дапамогі, абароны ад насілля ў любых яго формах, асабліва ў адносінах да дзяцей, - дапоўніў Валерый Бельскі. - Беларускі народ заплаціў за мір і дабрабыт вялікую, страшную цану, выпрацаваў імунітэт да несправядлівасці і дыктату. Разлічваем, што наш голас, галасы іншых народаў Зямлі будуць нарэшце пачуты і ўладныя людзі гэтага свету ў сваіх дзеяннях аддадуць перавагу не задавальненню карыслівых інтарэсаў пад прыкрыццём Глабальнага парадку дня, а элементарнай прыстойнасці і адказным паводзінам у дасягненні Мэт устойлівага развіцця", - дапоўніў нацыянальны каардынатар.

версія для друку

зрабіць стартавай

дабавіць у выбранае