Падзеі

БелМАПА і Азербайджанскі інстытут удасканалення ўрачоў падпісалі дагавор аб супрацоўніцтве

9 снежня, Мінск /Кар. БЕЛТА/. Беларуская медыцынская акадэмія паслядыпломнай адукацыі і Азербайджанскі інстытут удасканалення ўрачоў імя А.Аліева ў час візіту дэлегацыі Міністэрства аховы здароўя ў Азербайджан падпісалі дагавор аб супрацоўніцтве. Такая інфармацыя размешчана на афіцыйным сайце ведамства, паведамляе БЕЛТА.

Вывучэнне пытанняў удасканалення медыцынскай адукацыі - асноўная мэта візіту прадстаўнікоў сістэмы аховы здароўя Рэспублікі Беларусь на чале з начальнікам галоўнага ўпраўлення арганізацыйна-кадравай работы Міністэрства аховы здароўя Вольгай Калюпанавай.

8 снежня адбылася сустрэча беларускіх прадстаўнікоў сістэмы аховы здароўя з намеснікам міністра аховы здароўя Азербайджана Нігяр Аліевай і рэктарам Азербайджанскага дзяржаўнага інстытута ўдасканалення ўрачоў Назімам Гасымавым. Паводле слоў Вольгі Калюпанавай, на сустрэчы абмяркоўваліся пытанні ўдасканалення працэсу падрыхтоўкі медыцынскіх кадраў, прапанаваны канкрэтныя крокі па ўзаемадзеянні бакоў у справе навучання ўрачоў і сярэдняга медперсаналу Азербайджана ў медыцынскіх адукацыйных установах Беларусі. Пры гэтым азербайджанскія калегі падзяліліся вопытам падрыхтоўкі спецыялістаў у рэзідэнтуры, а таксама функцыянавання ўніверсітэцкіх клінік. Акрамя таго, былі абмеркаваны новыя падыходы да ўзаемадзеяння паміж краінамі ў сферы медадукацыі. Абмяркоўваліся пытанні каардынацыі прымянення новых метадаў лячэння і прафілактыкі, а таксама магчымасці абмену сучаснай метадычнай і навукова-практычнай інфармацыяй у галіне бесперапыннай прафесійнай адукацыі вышэйшых медыцынскіх спецыялістаў.

У ходзе візіту падпісаны дагавор аб узаемным супрацоўніцтве паміж Беларускай медыцынскай акадэміяй паслядыпломнай адукацыі і Азербайджанскім дзяржаўным інстытутам удасканалення ўрачоў. Як адзначыў рэктар БелМАПА Аляксей Чуканаў, адбыўся таксама грунтоўны абмен вопытам па выкарыстанні ў ходзе навучання сімуляцыйных тэхналогій. Напярэдадні адкрыцця Рэспубліканскага сімуляцыйнага цэнтра БелМАПА методыкі і тэхналогіі навучання ўяўляюць асаблівы інтарэс.

Рэктар БелМАПА таксама расказаў, што ў пагадненні, заключаным паміж дзвюма навучальнымі ўстановамі, прадугледжана правядзенне сумесных навуковых даследаванняў, прысвечаных клінічнай і прафілактычнай медыцыне, праблемам арганізацыі аховы здароўя. "Прадугледжана таксама правядзенне канферэнцый і семінараў па абмене вопытам у галіне арганізацыі навучальнага працэсу, укараненні ў навучальны працэс і практыку аховы здароўя метадаў навучання, дыягностыкі, прадугледжваецца каардынацыя пытанняў прымянення новых метадаў лячэння і прафілактыкі", - дадаў Аляксей Чуканаў.

Азербайджанскі дзяржаўны інстытут удасканалення ўрачоў імя. А.Аліева - адна са старэйшых устаноў вышэйшай медадукацыі ў Азербайджане. Менавіта тут урачы краіны павышаюць узровень адукацыі ў галіне медыцыны, даведваюцца аб новых фундаментальных дасягненнях медыцыны і вучацца прымяняць сучасныя метады дыягностыкі ў клінічнай практыцы.

версія для друку

зрабіць стартавай

дабавіць у выбранае