Падзеі

26 верасня, Мінск /Кар. БЕЛТА/. Беларускі вопыт процідзеяння гандлю людзьмі прадставіла на саміце па ўстойлівым развіцці Сусветнага эканамічнага форуму (СЭФ) у Нью-Ёрку намеснік старшыні Савета Рэспублікі, нацыянальны каардынатар па дасягненні Мэт устойлівага развіцця Мар'яна Шчоткіна. Аб гэтым БЕЛТА паведамілі ў прэс-службе верхняй палаты беларускага парламента.

"У час візіту ў Нью-Ёрк 25 верасня віцэ-спікер прыняла ўдзел у агульнай дыскусіі высокага ўзроўню 73-й сесіі Генеральнай асамблеі ААН. Мар'яна Шчоткіна таксама ўдзельнічала ў другім дні работы саміту па ўстойлівым развіцці. У час круглага стала па пытаннях барацьбы з рабствам была прадстаўлена інфармацыя аб нацыянальных намаганнях Беларусі ў галіне процідзеяння гандлю людзьмі і ўкладзе краіны ў міжнародны працэс па барацьбе з трафікінгам", - адзначылі ў прэс-службе.

На палях саміту намеснік старшыні Савета Рэспублікі правяла перагаворы з генеральным дырэктарам Міжнароднай арганізацыі працы Гаем Райдэрам.

Саміт СЭФ па ўстойлівым развіцці праходзіў у Нью-Ёрку 24-25 верасня і быў прымеркаваны да адкрыцця 73-й сесіі Генеральнай асамблеі ААН. Беларусь запрошана на яго ўпершыню. Мар'яна Шчоткіна ўзначальвала беларускую дэлегацыю.

Сусветны эканамічны форум (СЭФ) - гэта няўрадавая арганізацыя, якая аб'ядноўвае больш за 1 тыс. кампаній і карпарацый. Яе штаб-кватэра размешчана ў Жэневе (Швейцарыя). СЭФ выступае арганізатарам штогадовага эканамічнага форуму ў Давосе. Да ўдзелу ў ім запрашаюцца кіраўнікі дзяржаў, кіраўнікі вядучых карпарацый, вядомыя эканамічныя аналітыкі і журналісты.