Падзеі

Беларусь зацікаўлена ў рэгулярным абмене парламенцкімі дэлегацыямі з КНР і Інданезіяй

Фота з архiва

7 жніўня, Мінск /Кар. БЕЛТА/. Намеснік старшыні Палаты прадстаўнікоў Нацыянальнага сходу Беларусі Валерый Міцкевіч у рамках удзелу ў 44-й Генеральнай асамблеі Міжпарламенцкай асамблеі Асацыяцыі дзяржаў Паўднёва-Усходняй Азіі правёў шэраг сустрэч з парламенцкімі дэлегацыямі Кітайскай Народнай Рэспублікі і Рэспублікі Інданезія. Аб гэтым БЕЛТА паведамілі ў прэс-службе Палаты прадстаўнікоў.

У размове з кіраўніком парламенцкай дэлегацыі Кітайскай Народнай Рэспублікі, членам Камітэта Усекітайскага сходу народных прадстаўнікоў па ахове навакольнага асяроддзя і захаванні рэсурсаў Чжу Юнгуанем бакі абмяняліся меркаваннямі аб усебаковым развіцці давернага стратэгічнага партнёрства і ўзаемавыгаднага супрацоўніцтва Беларусі і Кітая.

Выказана надзея на прадаўжэнне рэгулярнага абмену візітамі парламенцкіх дэлегацый, у тым ліку на ўзроўні кіраўнікоў заканадаўчых органаў дзвюх краін. Абмеркаваны пытанні падпісання міжпарламенцкага пагаднення аб супрацоўніцтве і павышэння статусу парламенцкіх груп дружбы да ўзроўню міжпарламенцкай камісіі.

Чжу Юнгуань звярнуў увагу на наяўнасць значнага патэнцыялу двухбаковага супрацоўніцтва ў навукова-тэхнічнай сферы, у прыватнасці, паміж акадэміямі навук Беларусі і Кітая ў галіне правядзення сумесных навуковых даследаванняў і адукацыйных абменаў.

На сустрэчы з намеснікам старшыні Савета народных прадстаўнікоў Рэспублікі Інданезія Рахматам Гобелем падкрэслены высокі ўзровень палітычных адносін паміж краінамі, адзначаны важнасць абмену візітамі парламенцкіх дэлегацый. Бакі абмеркавалі перспектывы ўзаемадзеяння ў сферы міжрэгіянальнага супрацоўніцтва, пытанні далейшага развіцця беларуска-інданезійскага міжпарламенцкага дыялогу і дзейнасці груп дружбы. Валерый Міцкевіч пажадаў свайму калегу добрых вынікаў у рэалізацыі прапанаваных праграм і ініцыятыў Джакарты ў перыяд старшынства ў АСЕАН, а таксама паспяховага правядзення электаральнай кампаніі, якая пройдзе ў Інданезіі ў лютым наступнага года.

У рабоце 44-й Генеральнай асамблеі МПА АСЕАН прымае ўдзел больш як 500 дэлегатаў з 9 дзяржаў-удзельніц, 17 парламентаў-наглядальнікаў і 9 міжнародных арганізацый.

версія для друку

зрабіць стартавай

дабавіць у выбранае