Падзеі

12 ліпеня, Мінск /Кар. БЕЛТА/. Беларусь разлічвае на пашырэнне вытворчай кааперацыі з Сербіяй, паведаміў сёння журналістам пасол Беларусі ў Сербіі Валерый Брылёў на сустрэчы кіраўнікоў загранустаноў Беларусі з прадстаўнікамі прадпрыемстваў у БелГПП, перадае карэспандэнт БЕЛТА.

"Сербія зацікаўлена ў супрацоўніцтве, развіцці адносін па ўсіх напрамках. Што датычыцца гандлю, то традыцыйна гэта тэхніка. У нас ёсць зборачныя вытворчасці ў Сербіі трактароў, аўтобусаў, цяпер збіраюцца пажарныя машыны для патрэб МНС Сербіі. Мы намецілі ў супрацоўніцтве кааперацыйную лінію", - расказаў Валерый Брылёў.

У прапрацоўцы таксама стварэнне зборачнай вытворчасці камбайнаў і адкрыццё гандлёвых дамоў.

Тавараабарот Беларусі і Сербіі ў 2017 годзе склаў каля $240 млн, і ў гэтым годзе беларускі экспарт прадаўжае расці. Дзейнічае пагадненне аб свабодным гандлі паміж Беларуссю і Сербіяй - гэта добрая аснова для актывізацыі супрацоўніцтва, лічыць пасол.

Валерый Брылёў адзначыў, што ў Беларусі і Сербіі традыцыйна добрыя палітычныя адносіны. "Плануецца візіт у гэтым годзе Прэзідэнта ў Сербію, калі будуць добрыя напрацоўкі", - сказаў ён.