Падзеі

9 ліпеня, Мінск /Кар. БЕЛТА/. Беларусь прапануе Групе падтрымкі Шаўковага шляху ПА АБСЕ абмеркаваць у Мінску патэнцыял супрацоўніцтва ў рэгіёне, паведамілі БЕЛТА ў прэс-службе Палаты прадстаўнікоў.

Члены беларускай парламенцкай дэлегацыі 8 ліпеня прынялі ўдзел у сустрэчы Групы падтрымкі Шаўковага шляху ПА АБСЕ ў Берліне. Намеснік старшыні Палаты прадстаўнікоў Баляслаў Пірштук прадставіў удзельнікам сустрэчы тэму міжнароднай канферэнцыі Групы, якая запланавана на вясну 2019 года ў Мінску. "Віцэ-спікер унёс прапанову прысвяціць тэматыку Мінскай канферэнцыі патэнцыялу супрацоўніцтва ў рэгіёне, у тым ліку магчымасцям Беларусі як важнага звяна ў кантэксце фарміравання Эканамічнага пояса Шаўковага шляху", - праінфармавалі ў прэс-службе. Баляслаў Пірштук адзначыў таксама, што Група становіцца эфектыўнай парламенцкай пляцоўкай для абмеркавання разнастайнага спектра пытанняў палітычнага, гандлёва-эканамічнага і гуманітарнага супрацоўніцтва.

У час сустрэчы Групы адбыліся выбары двух намеснікаў яго старшыні, а таксама падтрымана заяўка аб уступленні ў яе дэлегацыі Францыі.

Беларускія парламентарыі прынялі актыўны ўдзел у рабоце агульных камітэтаў ПА АБСЕ. У сваіх выступленнях члены беларускай дэлегацыі выклалі пазіцыю Беларусі па асноўных пунктах міжнароднага парадку дня. Баляслаў Пірштук у сваім выступленні на пасяджэнні агульнага камітэта ПА АБСЕ па эканамічных пытаннях, навуцы, тэхналогіі і навакольным асяроддзі акцэнтаваў увагу на неабходнасці садзейнічання эканамічнаму прагрэсу ў рэгіёне АБСЕ праз развіццё чалавечага капіталу, папулярызацыю мадэлей належнага кіравання, барацьбу з карупцыяй і адмываннем грошай, праз інавацыі і пашырэнне лічбавай эканомікі. Ён звярнуў увагу членаў асамблеі на ініцыіраваны беларускімі парламентарыямі праект рэзалюцыі ПА АБСЕ. "Пашырэнне лічбавай эканомікі ў інтарэсах забеспячэння эканамічнага росту на прасторы АБСЕ". Дакумент адлюстроўвае пытанні пераходу і адаптацыі грамадства да лічбавай эканомікі, гарманізацыі стандартаў і міжнароднага супрацоўніцтва ў мэтах збліжэння дзяржаў і лічбавізацыі міжнароднага гандлю. Праект рэзалюцыі будзе разгледжаны на пасяджэнні агульнага камітэта ПА АБСЕ па эканамічных пытаннях, навуцы, тэхналогіі і навакольным асяроддзі.

Дэпутат Валерый Варанецкі, выступаючы на пасяджэнні агульнага камітэта ПА АБСЕ па палітычных пытаннях і бяспецы, расказаў аб ініцыятыве Прэзідэнта Беларусі Аляксандра Лукашэнкі, агучанай на 26-й штогадовай сесіі ПА АБСЕ ў Мінску. Беларускі лідар заявіў аб неабходнасці запуску новага маштабнага міжнароднага дыялогу па пытаннях бяспекі, аналагічнага Хельсінкскаму. Кіраўнік дзяржавы прапанаваў накіраваць "Хельсінкі-2" на пераадоленне існуючых супярэчнасцей ва ўзаемаадносінах дзяржаў на агульнай прасторы Еўраатлантыкі і Еўразіі. Валерый Варанецкі пацвердзіў гатоўнасць Беларусі і далей актыўна працаваць у АБСЕ па процідзеянні транснацыянальным выклікам і пагрозам. Так, у Мінску 9-10 кастрычніка адбудзецца антытэрарыстычная канферэнцыя АБСЕ высокага ўзроўню.

Сесія Парламенцкай асамблеі АБСЕ праходзіць у Берліне 7-11 ліпеня. Беларускую дэлегацыю на ёй узначальвае намеснік старшыні Палаты прадстаўнікоў Баляслаў Пірштук.