Падзеі

Беларусь на саміце ААН: адной з галоўных пагроз глабальнай харчовай бяспецы сталі санкцыі

Фота з архiва

26 ліпеня, Мінск /Кар. БЕЛТА/. Прадстаўнік Рэспублікі Беларусь выступіў на пленарнай сесіі Саміту ААН па харчовых сістэмах+2 у Рыме. Аб гэтым карэспандэнту БЕЛТА расказалі ў беларускім знешнепалітычным ведамстве.

"Нягледзячы на беспрэцэдэнтны санкцыйны націск, з якім Беларусь сутыкнулася пасля 2020 года, наша краіна прадаўжае быць стабільным пастаўшчыком прадуктаў харчавання. Так, у 2022 годзе нам удалося не толькі павялічыць аб'ём вытворчасці, але і значна пашырыць геаграфію паставак, - адзначыў беларускі прадстаўнік. - Агульны экспарт у мінулым годзе аграхарчовых тавараў з Беларусі склаў $8,3 млрд. Беларусь застаецца адным з буйнейшых экспарцёраў малочнай прадукцыі, мяса птушкі, рапсавага алею, многіх іншых тавараў і, вядома, угнаенняў".

Пры гэтым Беларусь шматразова акцэнтавала ўвагу на негатыўных наступствах для ўсёй міжнароднай супольнасці аднабаковых прымусовых мер, якія шэраг дзяржаў уводзяць у парушэнне Статута ААН супраць сваіх палітычных апанентаў.

"Апошні даклад аб Стане спраў у галіне харчовай бяспекі і харчавання ў свеце дэманструе бязрадасную карціну, - падкрэсліў прадстаўнік Беларусі. - Колькасць галадаючых у свеце практычна не змяншаецца. Амаль 30 працэнтаў насельніцтва планеты сутыкаюцца з праблемай умеранай або вострай адсутнасці харчовай бяспекі".

Адной з галоўных крыніц пагрозы глабальнай харчовай бяспецы з'яўляюцца санкцыі. ФАО, Сусветны банк і многія іншыя аўтарытэтныя арганізацыі звяртаюць увагу, што адной з прычын росту цэн сталі санкцыі ў адносінах да беларускіх угнаенняў.

Беларускі бок упэўнены, што надышоў час для актыўных дзеянняў і адказных палітычных рашэнняў.

"Трэба нарэшце ўсім прызнаць, што мы жывём у перыяд планетарнай трансфармацыі, для якой характэрны дэфіцыт даверу і недахоп прадказальнасці. Гэта вынік значных рознагалоссяў, перш за ўсё паміж буйнымі дзяржавамі, па пытаннях бяспекі, - адзначыў беларускі прадстаўнік. - У існуючых умовах неабходна забяспечыць устойлівасць тавараправодных ланцужкоў для прадуктаў харчавання і ўгнаенняў. Выключыць прымяненне ў адносінах да іх санкцый і іншых гандлёвых абмежаванняў і бар'ераў. Дарэчы, на гэта была звернута ўвага на праведзенай не так даўно 43-й Канферэнцыі ФАО і менавіта ад гэтага трэба адштурхоўвацца пры выпрацоўцы мер падтрымання і развіцця харчовых сістэм".

версія для друку

зрабіць стартавай

дабавіць у выбранае