Падзеі

Беларусь добрасумленна выконвае абавязацельствы перад ЕАЭС у сферы прамысловых субсідый - ЕЭК

У час сустрэчы. Фота ЕЭК

9 ліпеня, Масква /Эдуард Півавар - БЕЛТА/. Беларусь добрасумленна выконвае абавязацельствы перад партнёрамі па Еўразійскім эканамічным саюзе ў сферы прамысловых субсідый. Аб гэтым БЕЛТА заявілі ў прэс-службе Еўразійскай эканамічнай камісіі па выніках сустрэчы члена Калегіі (міністра) па прамысловасці і аграпрамысловым комплексе ЕЭК Артака Камаляна з міністрам эканомікі Беларусі Аляксандрам Чарвяковым.

"Міністр па прамысловасці і аграпрамысловым комплексе ЕЭК на сустрэчы з міністрам эканомікі Беларусі Аляксандрам Чарвяковым выказаў удзячнасць за актыўны ўдзел міністэрства ў рабоце кансультатыўных і дарадчых органаў Еўразійскага эканамічнага саюза, - сказалі ў прэс-службе. - У прыватнасці, ён адзначыў актыўную сумесную дзейнасць у сферы прамысловых субсідый. Артак Камалян падкрэсліў, што Беларусь своечасова і ў поўнай меры накіроўвае ў камісію і іншым дзяржавам-членам паведамленні аб прамысловых субсідыях, тым самым добрасумленна выконваючы свае абавязацельствы па ўзаемным інфармаванні ў гэтай галіне".

"Мы зацікаўлены ў прадаўжэнні канструктыўнага дыялогу з партнёрамі з Беларусі для далейшага ўзаемадзеяння ў рамках нашага саюза ў гандлёва-эканамічнай сферы, рэалізацыі сумесных праектаў на ўзаемавыгаднай аснове і выбудоўвання новай архітэктуры супрацоўніцтва", - заявіў міністр ЕЭК.

Артак Камалян праінфармаваў Аляксандра Чарвякова аб паглыбленні супрацоўніцтва з Еўразійскім банкам развіцця і далейшай актывізацыі работы на гэтым напрамку. Ён запрасіў Міністэрства эканомікі Беларусі прыняць удзел у падрыхтоўцы прапаноў па саюзных кааперацыйных праектах.

Па ініцыятыве Мінэканомікі Беларусі бакі дамовіліся прапрацаваць магчымасці фінансавання кааперацыйных ланцужкоў у ЕАЭС, сумесных фундаментальных навуковых даследаванняў пры задзейнічанні фінансавых інстытутаў саюза. "Асобным важным напрамкам у ЕАЭС павінна стаць фарміраванне рынку нематэрыяльных актываў на адпаведнай лічбавай платформе з наступным уключэннем краін СНД і іншых дзяржаў", - дадалі ў ЕЭК.

версія для друку

зрабіць стартавай

дабавіць у выбранае