Падзеі

27 лютага, Мінск /Кар. БЕЛТА/. Пратакол мерапрыемстваў па развіцці супрацоўніцтва паміж урадам Беларусі і ўрадам Удмурцкай Рэспублікі (Расійская Федэрацыя) на 2015-2017 гады падпісалі сёння ў Мінску прэм'ер-міністр Беларусі Андрэй Кабякоў і кіраўнік Удмуртыі Аляксандр Салаўёў, перадае карэспандэнт БЕЛТА.

Яшчэ да цырымоніі падпісання кіраўнік беларускага ўрада адзначыў, што Беларусь вельмі цэніць адносіны з расійскімі рэгіёнамі. "Гэта той абсалютна надзейны, правераны часам партнёр і сябар, які ніколі не падвядзе, заўсёды канкрэтны, паслядоўны, прадказальны і эфектыўны", - сказаў Андрэй Кабякоў.

Пры гэтым прэм'ер канстатаваў, што цяперашні ўзровень гандлёва-эканамічнага супрацоўніцтва паміж Беларуссю і Удмурцкай Рэспублікай не адпавядае існуючаму патэнцыялу бакоў (па выніках 2014 года ўзаемны тавараабарот склаў $44 млн). Разам з тым ён выказаў надзею на тое, што гэты візіт удмурцкай дэлегацыі, у час якога адбылася сустрэча Аляксандра Салаўёва з беларускім лідарам, ужо да канца 2015 года дасць магчымасць істотна палепшыць сітуацыю.

У сваю чаргу Аляксандр Салаўёў адзначыў зацікаўленасць у развіцці і ўмацаванні двухбаковага супрацоўніцтва. У гэтыя дні члены дэлегацый вывучаюць магчымыя напрамкі, наведваюць беларускія прадпрыемствы. Паводле слоў кіраўніка Удмурцкай Рэспублікі, з кіраўніцтвам беларускіх прадпрыемстваў падпісаны шэраг намераў аб супрацоўніцтве. Асаблівы інтарэс ва Удмурцкага боку выклікае фармацэўтыка, паколькі гэты расійскі рэгіён практычна не вырабляе лякарстваў.