Падзеі

Беларусь і Рэспубліка Карэя стварылі савет дзелавога супрацоўніцтва

9 ліпеня, Мінск /Кар. БЕЛТА/. Беларусь і Рэспубліка Карэя стварылі савет дзелавога супрацоўніцтва. Адпаведны пратакол падпісалі старшыня Беларускай гандлёва-прамысловай палаты Уладзімір Улаховіч і прэзідэнт Карэйскай асацыяцыі міжнароднага гандлю (КІТА) Ку Джа Ель на інаўгурацыйнай сесіі, якая прайшла ў рэжыме відэаканферэнцыі, паведамляе БЕЛТА са спасылкай на сайт БелТПП.

Савет створаны ў рамках рэалізацыі пагаднення аб супрацоўніцтве паміж БелГПП і КІТА, падпісанага 15 снежня 2020 года. "Гэта новая пляцоўка для абмеркавання пытанняў бізнесу і ўмацавання эканамічнага, інвестыцыйнага і навукова-тэхнічнага супрацоўніцтва дзвюх краін. У склад дзелавога савета ўвойдуць кіраўнікі кампаній Беларусі і Рэспублікі Карэя, якія маюць паспяховы вопыт узаемадзеяння і ўносяць уклад у пашырэнне двухбаковых дзелавых і эканамічных адносін, а таксама прадпрыемствы, зацікаўленыя ў рэалізацыі сумесных праектаў у найбольш перспектыўных сферах", - адзначылі ў палаце. Старшынямі савета будуць кіраўнікі БелГПП і КІТА. Плануецца, што пасяджэнні новай структуры будуць праходзіць не радзей за адзін раз на год.

У інаўгурацыйнай сесіі Беларуска-карэйскага савета дзелавога супрацоўніцтва прынялі ўдзел старшыня БелГПП Уладзімір Улаховіч, старшыня KITA Ку Джа Ель, Надзвычайны і Паўнамоцны Пасол Беларусі ў Рэспубліцы Карэя Андрэй Папкоў, прадстаўнікі Нацыянальнага агенцтва інвестыцый і прыватызацыі, адміністрацыі Парка высокіх тэхналогій, адміністрацыі Кітайска-беларускага індустрыяльнага парка "Вялікі камень", Міністэрства замежных спраў Беларусі, Навукова-даследчага эканамічнага інстытута Мінэканомікі, Карэйскага інстытута міжнароднай эканамічнай палітыкі.

Бізнес Беларусі і Рэспублікі Карэя прадставілі кіраўнікі і спецыялісты знешнегандлёвых і маркетынгавых службаў больш як 20 вядучых кампаній у галіне электронікі, станкабудавання, аўтамабілебудавання, фармацэўтыкі, інфармацыйных тэхналогій і іншых сфер. Удзельнікі сесіі абмеркавалі бягучы стан і перспектывы развіцця гандлёва-эканамічнага супрацоўніцтва, магчымыя праекты бізнесу дзвюх краін. Адбыліся прэзентацыі беларускіх і карэйскіх кампаній.

версія для друку

зрабіць стартавай

дабавіць у выбранае