Падзеі

6 красавіка, Масква /Эдуард Півавар - БЕЛТА/. Беларусь і Расія поўнасцю завяршылі фарміраванне аб'яднанай сістэмы ППА ва Усходне-Еўрапейскім рэгіёне калектыўнай бяспекі. Аб гэтым заявіў журналістам начальнік галоўнага штаба - першы намеснік галоўнакамандуючага Паветрана-касмічных сіл Расіі Павел Курачэнка па выніках праведзенага сёння ў Цвяры пасяджэння Каардынацыйнага камітэта па пытаннях ППА пры Савеце міністраў абароны дзяржаў - удзельніц СНД, перадае карэспандэнт БЕЛТА.

"Практычная рэалізацыя пагаднення завершана, у далейшым асноўныя намаганні будуць сканцэнтраваны на нясенні сумеснага баявога дзяжурства па ППА і правядзенні практычных сумесных мерапрыемстваў аператыўнай і баявой падрыхтоўкі", - сказаў Павел Курачэнка.

Пагадненне паміж Беларуссю і Расіяй аб сумеснай ахове знешняй граніцы Саюзнай дзяржавы ў паветранай прасторы і стварэнні Адзінай рэгіянальнай сістэмы было падпісана і ратыфікавана ў 2009 годзе.

На пасаду камандуючага Адзінай рэгіянальнай сістэмы ППА назначаны камандуючы ВПС і войскамі ППА Узброеных Сіл Беларусі генерал-маёр Алег Двігалеў.