Падзеі

Беларусь і Індыя маюць намер развіваць навукова-тэхнічнае і інавацыйнае супрацоўніцтва

Фота з архiва

14 мая, Мінск /Кар. БЕЛТА/. Беларусь і Індыя маюць намер развіваць навукова-тэхнічнае і інавацыйнае супрацоўніцтва. Аб гэтым ішла размова на сустрэчы старшыні Дзяржаўнага камітэта па навуцы і тэхналогіях Сяргея Шлычкова з Надзвычайным і Паўнамоцным Паслом Індыі ў Беларусі Алокам Ранджанам Джа, паведамілі БЕЛТА ў прэс-службе ДКНТ.

"Дзяржаўны камітэт па навуцы і тэхналогіях Беларусі падзяляе пазіцыю індыйскага боку аб важнасці супрацоўніцтва ў сферы навукі, тэхналогій і інавацый для абедзвюх краін. Мы маем дастаткова агульных інтарэсаў і нядрэнныя перспектывы для развіцця ўзаемадзеяння", - адзначыў Сяргей Шлычкоў.

На рэгулярнай аснове праводзяцца пасяджэнні сумеснай беларуска-індыйскай камісіі па супрацоўніцтве ў галіне навукі і тэхналогій. Падчас сустрэчы бакі дамовіліся ў бліжэйшы час узгадніць па дыпламатычных каналах тэрміны правядзення і парадак дня 10-га пасяджэння камісіі.

Таксама ў мэтах актывізацыі двухбаковага навукова-тэхнічнага і інавацыйнага супрацоўніцтва ў сферы біятэхналогій і новых матэрыялаў дасягнута дамоўленасць правесці да канца года сумесную кантактна-кааперацыйную біржу партнёраў "Беларусь - Індыя: партнёрства для інавацый".

Акрамя таго, цяпер ДКНТ і Міністэрства навукі і тэхналогій Індыі праводзяць конкурс сумесных беларуска-індыйскіх навукова-тэхнічных праектаў на 2022-2023 гады па такіх напрамках, як інфармацыйна-камунікацыйныя тэхналогіі з акцэнтам на штучны інтэлект, інтэрнэт рэчаў, машыннае навучанне, воблачныя сэрвісы, новыя матэрыялы, біятэхналогіі, уключаючы медыцыну і фармацэўтыку.

Па выніках 2021 года экспарт тавараў высокага тэхналагічнага ўзроўню ў Індыю склаў $343,1 млн.

версія для друку

зрабіць стартавай

дабавіць у выбранае