Падзеі

20 ліпеня, Мінск /Кар. БЕЛТА/. Беларусь і Францыя будуць развіваць супрацоўніцтва ў прыродаахоўнай сферы. Аб гэтым ішла размова ў час сустрэчы міністра прыродных рэсурсаў і аховы навакольнага асяроддзя Беларусі Андрэя Худыка з Надзвычайным і Паўнамоцным Паслом Францыі ў Беларусі Дзідзье Канесам. Такая інфармацыя размешчана на сайце Мінпрыроды, паведамляе БЕЛТА.

Андрэй Худык падкрэсліў, што Беларусь і Францыя маюць вопыт узаемавыгаднага партнёрства ў галіне аховы навакольнага асяроддзя, у тым ліку ў сферы абыходжання з небяспечнымі адходамі. У 2012 годзе на завод французскай кампаніі "Трэдзі" было вывезена і там знішчана 823 т адходаў, якія маюць у саставе небяспечныя хімічныя рэчывы. Гэта дало магчымасць скараціць на 17 працэнтаў агульную колькасць існуючых у Беларусі адходаў з поліхларыраванымі біфеніламі. Таксама гэта кампанія прымала ўдзел у рэалізацыі праекта міжнароднай тэхнічнай дапамогі па ліквідацыі склада часовага захоўвання патэнцыяльна небяспечных для здароўя людзей і навакольнага асяроддзя пестыцыдаў у вёсцы Мізгіры Слонімскага раёна Гродзенскай вобласці.

Новым імпульсам для двухбаковых адносін у прыродаахоўнай сферы стала пагадненне паміж Міністэрствам прыродных рэсурсаў і аховы навакольнага асяроддзя Беларусі і Міністэрствам навакольнага асяроддзя, энергетыкі і мора Францыі аб супрацоўніцтве ў галіне аховы навакольнага асяроддзя і ўстойлівага развіцця, падпісанае ў 2016 годзе. Андрэй Худык адзначыў станоўчую ролю сумеснай ведамаснай рабочай групы ў развіцці ўзаемадзеяння ў прыродаахоўнай сферы.

"У Беларусі сёння з'яўляецца ўсё больш новых тэхналогій, адкрываюцца сучасныя вытворчасці, і гэта нязменна вядзе да дадатковага ўтварэння розных відаў адходаў. Усімі прызнана, што ў пытанні перапрацоўкі адходаў Францыя займае перадавыя пазіцыі, і на ваш вопыт можна і трэба раўняцца. Мы зацікаўлены ў вывучэнні вашых ведаў і багатай практыкі, каб, выкарыстоўваючы іх, у далейшым маглі самастойна экалагічна ўтылізоўваць і абясшкоджваць небяспечныя адходы", - сказаў міністр.

Акрамя таго, у час сустрэчы абмяркоўваліся пытанні развіцця супрацоўніцтва паміж Рэспубліканскім цэнтрам па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды Беларусі і Нацыянальнай метэаралагічнай службай Францыі.

"Андрэй Худык таксама прапанаваў Дзідзье Канесу азнаёміцца з вопытам Беларусі па рэгуляванні і развіцці сістэмы асабліва ахоўных прыродных тэрыторый, наведаць прызнаны турыстычны брэнд краіны - Белавежскую пушчу, дзе можна ўбачыць унікальныя помнікі прыроды, і не менш каштоўны прыродны комплекс - Бярэзінскі біясферны запаведнік, які атрымаў сусветную вядомасць як эталон некранутай натуральнай прыроды і чыстага паветра", - адзначылі ў прэс-службе.

Абодва бакі выказалі ўпэўненасць, што гэта сустрэча стане чарговым крокам на шляху далейшага ўмацавання беларуска-французскага супрацоўніцтва ў галіне аховы навакольнага асяроддзя.