Падзеі

26 лістапада, Мінск /Кар. БЕЛТА/. Беларусь і Філіпіны дамовіліся аб падпісанні ў бліжэйшы час мемарандума аб двухбаковых кансультацыях паміж міністэрствамі замежных спраў і стварэнні механізма рэгулярнага палітычнага дыялогу. Гэта тэма абмяркоўвалася сёння на сустрэчы намесніка міністра замежных спраў Беларусі Андрэя Дапкюнаса з паслом Філіпін у Расіі і Беларусі (па сумяшчальніцтве) Карласам Дэймекам Сарэта, паведамілі БЕЛТА ў прэс-службе беларускага знешнепалітычнага ведамства.

На сустрэчы таксама былі абмеркаваны стан і перспектывы развіцця беларуска-філіпінскіх адносін, субяседнікі абмяняліся думкамі аб актуальных пытаннях міжнароднага парадку дня, падкрэслілі важнасць міжпарламенцкага вымярэння беларуска-філіпінскага супрацоўніцтва як па двухбаковай лініі, так і ў глабальных і рэгіянальных міжпарламенцкіх структурах.

Бакі пацвердзілі ўзаемную зацікаўленасць у арганізацыі ў 2019 годзе візіту міністра замежных спраў Беларусі ў Філіпіны. У час гутаркі была адзначана важнасць хутчэйшага завяршэння работы над некалькімі двухбаковымі дакументамі, у тым ліку базавых эканамічных пагадненняў і пагаднення аб адмене віз для ўладальнікаў дыпламатычных і службовых пашпартоў.

Напярэдадні маючага адбыцца ў снежні 2018 года візіту ў Беларусь дэлегацыі Міністэрства сельскай гаспадаркі Філіпін Андрэй Дапкюнас і Карлас Дэймек Сарэта абмеркавалі магчымыя формы больш актыўнага супрацоўніцтва паміж дзвюма краінамі ў галіне сельскагаспадарчай вытворчасці, у тым ліку выкарыстання Філіпінамі перадавых беларускіх сельскагаспадарчых тэхналогій. Філіпінскі пасол выказаў зацікаўленасць у арганізацыі паставак у Беларусь з Філіпін свежай рыбы і фруктаў.

Асаблівай тэмай размовы сталі магчымасці далейшага паглыблення актыўнага супрацоўніцтва паміж Беларуссю і Філіпінамі ў міжнародных арганізацыях, перш за ўсё ў ААН і Руху недалучэння, а таксама ўмацавання традыцый узаемнай падтрымкі.