Падзеі

7 мая, Мінск /Кар. БЕЛТА/. Беларусь і Аб'яднаныя Арабскія Эміраты ўзгаднілі ветэрынарныя сертыфікаты на малако і малочную прадукцыю, мяса і мясную прадукцыю, а таксама мёд і гатовую харчовую прадукцыю ў шырокім асартыменце. Аб гэтым паведаміў карэспандэнту БЕЛТА начальнік галоўнага ўпраўлення знешнеэканамічнай дзейнасці Міністэрства сельскай гаспадаркі і харчавання Беларусі Аляксей Багданаў.

"У час сустрэчы з прадстаўніком Міністэрства змянення клімату і навакольнага асяроддзя ААЭ былі ўзгоднены ветэрынарныя сертыфікаты на малако і малочную прадукцыю, мяса і мясную прадукцыю, а таксама мёд і гатовую харчовую прадукцыю ў шырокім асартыменце. Гэта дасць магчымасць бесперашкодна пастаўляць беларускія прадукты харчавання на рынак ААЭ. Узгадненне формы і зместу ветэрынарных сертыфікатаў прадугледжвае пастаўкі і давер ветэрынарных службаў адзін аднаму. Гэта вялікае дасягненне ў гандлёвых адносінах", - сказаў Аляксей Багданаў.

Бакі дамовіліся ў бліжэйшы час арганізаваць візіт у Беларусь прадстаўнікоў Міністэрства змянення клімату і навакольнага асяроддзя ААЭ і Эмірацкага агенцтва па стандартызацыі і метралогіі для сертыфікацыі пяці птушкафабрык і трох мясакамбінатаў, у тым ліку згодна са стандартам "Халяль". "Акрамя таго, мы дамовіліся з буйнейшай эмірацкай дзяржкампаніяй Emirates Future аб актывізацыі як гандлёвага, так і інвестыцыйнага супрацоўніцтва пасля праходжання беларускімі прадпрыемствамі сертыфікацыі "Халяль", - дадаў начальнік галоўнага ўпраўлення ЗЭД.