Падзеі

Беларусь - БРІКС. Падрабязнасці візіту Алейніка ў ПАР

Фота МЗС

25 жніўня, Мінск /Кар. БЕЛТА/. Міністр замежных спраў Беларусі Сяргей Алейнік 23-24 жніўня прыняў удзел у мерапрыемствах 15-га саміту БРІКС у ПАР, паведамляе БЕЛТА.

На палях мерапрыемства кіраўнік беларускага знешнепалітычнага ведамства правёў двухбаковыя перагаворы з кіраўніком Эрытрэі, калегамі з Экватарыяльнай Гвінеі, Анголы, Саудаўскай Аравіі, ААЭ.

Адна з ключавых тэм - харчовая бяспека

"Сустрэчы былі прысвечаны абмеркаванню прадметных пытанняў двухбаковага супрацоўніцтва, тэме паставак беларускай прадукцыі на рынкі гэтых краін, сумесным кааперацыйным праектам, узгадненню графікаў маючых адбыцца кантактаў і візітаў на розных узроўнях, развіццю двухбаковай дагаворна-прававой базы", - расказалі ў прэс-службе МЗС.

Адной з ключавых тэм стала харчовая бяспека, якая непакоіць пераважную большасць краін свету. Гэта праблема асабліва востра стаіць для афрыканскага кантынента. "У сувязі з гэтым падрабязна абмяркоўваліся магчымасці па аказанні садзейнічання рэгіёну з боку Беларусі, у тым ліку пастаўкамі сельскагаспадарчай тэхнікі, абсталявання і падрыхтоўкай спецыялістаў, - адзначылі ў ведамстве. - З краінамі Заліва была дадаткова закранута тэматыка паставак беларускай сельскагаспадарчай прадукцыі "Халяль" і магчымасцей сумеснай работы з афрыканскімі дзяржавамі. Дасягнуты шэраг канкрэтных дамоўленасцей, рэалізацыя якіх пачнецца ўжо ў бліжэйшы час".

Краіны выступаюць за разнастайнасць шляхоў развіцця

У час абмеркавання сітуацыі ў свеце і ўзаемадзеяння на шматбаковых пляцоўках было канстатавана супадзенне падыходаў па ключавых бягучых праблемах. Бакі выступілі за разнастайнасць шляхоў развіцця, шматпалярнасць, недапушчальнасць націску і ўкаранення чужых каштоўнасцей у міжнародных адносінах. Была канстатавана безальтэрнатыўнасць дыпламатычнага шляху ўрэгулявання ўкраінскага крызісу.

У час саміту Сяргей Алейнік правёў кароткія размовы з прэзідэнтамі Бразіліі і Ірана, а таксама сустрэчы з прэм'ер-міністрам Бангладэш, міністрам замежных спраў Кітая, кіраўніком іранскай дыпламатыі, кіраўнікамі знешнепалітычных ведамстваў Індыі і Расіі, калегамі з Кубы, Кеніі, Алжыра, Туніса, Тога і кіраўнікамі шэрага іншых дэлегацый.

Не прымнажаць раздзяляльныя лініі, а прызнаць салідарную адказнасць

У час выступлення на пленарным пасяджэнні "БРІКС аўтрыч" Сяргей Алейнік падкрэсліў, што сёння першарадная роля павінна належаць структурам, якія не прымнажаюць раздзяляльныя лініі, а прызнаюць салідарную адказнасць за цяперашні час і агульную будучыню чалавецтва. "Як ніколі запатрабаваны аб'яднанні, удзельнікі якіх не процістаяць адзін аднаму, а разам шукаюць шляхі руху наперад. Дыскрымінацыя і неакаланіяльныя падыходы застануцца ў мінулым", - заявіў міністр.

Кіраўнік знешнепалітычнага ведамства адзначыў, што Беларусі ёсць што прапанаваць арганізацыі. Краіна гатова ў тым ліку ўносіць уклад у падтрыманне міжнароднай харчовай бяспекі.

Беларусь таксама падтрымлівае імкненне БРІКС да пашырэння ўзаемадзеяння ў галіне лагістыкі і трансгранічнай электроннай камерцыі. Сяргей Алейнік выказаў жаданне беларускага боку далучыцца да намаганняў БРІКС па павелічэнні ўзаемных разлікаў у нацыянальных валютах і стварэнні агульных плацежных інструментаў.

Міністр таксама пацвердзіў гатоўнасць зборнай Беларусі ў выпадку запрашэння прыняць удзел у спартыўных Гульнях краін БРІКС у 2024 годзе.

Што такое БРІКС

БРІКС (BRICS – скарачэнне ад Brazil, Russia, India, China, South Africa) – гэта нефармальнае міждзяржаўнае аб'яднанне Бразіліі, Расіі, Індыі, Кітая і Паўднёва-Афрыканскай Рэспублікі. На долю краін, якія ўваходзяць у арганізацыю, прыпадае 26 працэнтаў тэрыторыі Зямлі, 42 працэнты насельніцтва планеты і 31,5 працэнта сусветнага ВУП. Гэта перасягае паказчыкі краін "Вялікай сямёркі", ВУП якіх складае 30,7 працэнта ад сусветнага і на якіх прыпадае каля 20 працэнтаў глабальнага гандлю і 25 працэнтаў прамых інвестыцый.

На 15-м саміце БРІКС у ПАР прынята рашэнне аб прыёме ў аб'яднанне з 1 студзеня 2024 года Аргенціны, Егіпта, Ірана, ААЭ, Саудаўскай Аравіі, Эфіопіі.

Прэзідэнт Беларусі Аляксандр Лукашэнка ў маі 2023 года афіцыйна выказаў намер краіны далучыцца да фармату БРІКС.

версія для друку

зрабіць стартавай

дабавіць у выбранае