Падзеі

Аруп Банерджы назначаны новым рэгіянальным дырэктарам Сусветнага банка па Беларусі, Малдове і Украіне

Фота Сусветнага банка

30 чэрвеня, Мінск /Кар. БЕЛТА/. Аруп Банерджы назначаны на пасаду рэгіянальнага дырэктара Сусветнага банка па Беларусі, Малдове і Украіне з 1 ліпеня, паведамілі БЕЛТА ў прадстаўніцтве Сусветнага банка ў Беларусі.

На гэтай пасадзе Аруп Банерджы будзе кіраваць узаемадзеяннем банка з урадамі, зацікаўленымі бакамі і партнёрамі ў трох дзяржавах. Ён будзе адказваць за забеспячэнне і рэалізацыю інвестыцыйнай, крэдытнай і аналітычнай дзейнасці СБ, а таксама каардынаваць будучыя напрамкі праграм. Аруп Банерджы будзе працаваць сумесна з IFC і MIGA з мэтай пашырэння работы групы Сусветнага банка ў Беларусі, Малдове і Украіне.

Да свайго цяперашняга назначэння Аруп Банерджы, грамадзянін Індыі, займаў пасаду рэгіянальнага дырэктара Сусветнага банка па ЕС і кіраваў аператыўнай, стратэгічнай, аналітычнай і інфармацыйнай работай Сусветнага банка ў краінах ЕС. Да гэтага выступаў у якасці старшага дырэктара і кіраўніка глабальнай практыкі па сацыяльнай абароне і занятасці Сусветнага банка і ўзначальваў работу Сусветнага банка ў галіне рынку працы, сістэм сацыяльнай абароны і пенсійнага забеспячэння.

Да пераходу ў Сусветны банк у 1988 годзе выкладаў у Цэнтры эканомікі развіцця Каледжа Уільямс, дзе займаў пасаду дырэктара паслядыпломнай адукацыі, і ў Пенсільванскім універсітэце. Атрымаў ступені магістра і кандыдата эканамічных навук у Пенсільванскім універсітэце і ступень бакалаўра эканамічных навук у Дэлійскім універсітэце ў Індыі.

Перад гэтым назначэннем пасаду рэгіянальнага дырэктара Сусветнага банка па Беларусі, Малдове і Украіне з ліпеня 2016 года займала Сату Кахканен. У лютым 2020 года Сату Кахканен была назначана кіраўніком прадстаўніцтва Сусветнага банка ў Інданезіі і Усходнім Тыморы.

версія для друку

зрабіць стартавай

дабавіць у выбранае