Падзеі

Андрэйчанка: Беларусь і Расія набралі вельмі сур'ёзныя тэмпы ў саюзнай інтэграцыі

Фота з архiва

4 верасня, Масква /Эдуард Півавар - БЕЛТА/. Беларусь і Расія набралі вельмі сур'ёзныя тэмпы ў саюзнай інтэграцыі. Аб гэтым заявіў старшыня Палаты прадстаўнікоў Нацыянальнага сходу Беларусі Уладзімір Андрэйчанка на адкрыцці пашыранага пасяджэння Савета Парламенцкага сходу Саюза Беларусі і Расіі, якое 4 верасня праходзіць у Пскове, паведамляе карэспандэнт БЕЛТА.

"Мы набралі вельмі сур'ёзныя тэмпы, я лічу, у саюзнай інтэграцыі. Прэзідэнтамі Беларусі і Расіі, урадамі вырашаюцца ўсе пытанні, каб санкцыі не аказвалі ўплыву на работу нашых прадпрыемстваў і штодзённае жыццё грамадзян", - сказаў Уладзімір Андрэйчанка.

У якасці яскравага прыкладу гэтага ён назваў развіццё тавараабароту паміж дзвюма дзяржавамі. "У студзені-чэрвені бягучага года тавараабарот Беларусі і Расіі склаў $23,5 млрд і павялічыўся ў параўнанні са студзенем-чэрвенем 2022 года на $3,5 млрд. Я лічу, што гэта сур'ёзныя паказчыкі", - канстатаваў спікер.

"Толькі ў бягучым годзе Беларусь наведалі 25 дэлегацый расійскіх рэгіёнаў на чале з іх кіраўнікамі, прынята 46 афіцыйных дэлегацый з удзелам прадстаўнікоў дзелавых колаў, праведзена 30 пасяджэнняў двухбаковых рабочых груп. Мы лічым, што нам і далей трэба развіваць такую практыку, паколькі менавіта ўзаемадзеянне на гарызантальным узроўні можа даваць найбольш відавочныя вынікі. Такія сустрэчы даюць магчымасць выявіць, што хвалюе людзей, якія праблемы трэба вырашаць і што яшчэ неабходна зрабіць для ўстаранення бар'ераў, якія засталіся ў нашай інтэграцыі", - падкрэсліў Уладзімір Андрэйчанка.

Паводле яго слоў, ключавую ролю ў фарміраванні адзінай эканамічнай прасторы адыгрывае актывізацыя міжрэгіянальнага і прыгранічнага супрацоўніцтва. "Яго неабходна максімальна выкарыстоўваць, каб суб'екты гаспадарання Беларусі і Расіі не адчувалі ні межаў, ні адлегласцей, - заявіў старшыня Палаты прадстаўнікоў. - Неабходна ўзмацніць ролю рэгіянальных органаў улады ў распрацоўцы і рэалізацыі праграм і праектаў Саюзнай дзяржавы. У сувязі з гэтым, на наш погляд, зняцце прававых абмежаванняў для ўдзелу абласных выканаўчых камітэтаў Беларусі, а таксама вышэйшых выканаўчых органаў суб'ектаў Расійскай Федэрацыі ў якасці дзяржаўных заказчыкаў праграм і праектаў Саюзнай дзяржавы магло б надаць дадатковы імпульс актывізацыі міжрэгіянальнага і прыгранічнага супрацоўніцтва ў рамках Саюзнай дзяржавы і садзейнічаць распрацоўцы новых праграм і праектаў. Я думаю, гэта пытанне трэба сёння абмеркаваць".

"Вялікія перспектывы мае запуск такіх праектаў, як напрыклад, захаванне агульнай гістарычнай памяці, патрыятычнага выхавання моладзі, развіцця транспартнай інфраструктуры, якая звязвае рэгіёны, турызм, адукацыя, культура. Найбольш актуальнай формай супрацоўніцтва становіцца сёння падрыхтоўка кадраў: неабходна выпрацаваць адзіныя праграмы і падыходы да падрыхтоўкі па самых запатрабаваных спецыяльнасцях, паколькі без гэтага мы атрымаем практыку пераманьвання маладых спецыялістаў", - дадаў Уладзімір Андрэйчанка.

версія для друку

зрабіць стартавай

дабавіць у выбранае