Падзеі

Анатоль Лапо назначаны прадстаўніком Савета камандуючых пагранвойскамі пры Выканаўчым камітэце СНД

31 жніўня, Мінск /Кар. БЕЛТА/. Сёння па даручэнні Савета камандуючых пагранічнымі войскамі старшыня Дзяржаўнага пагранічнага камітэта Канстанцін Моластаў прадставіў калектыву Выканаўчага камітэта СНД новага прадстаўніка Савета камандуючых пагранвойскамі пры Выканаўчым камітэце СНД. Ім стаў Анатоль Лапо, які да нядаўняга часу ўзначальваў Дзяржаўны пагранічны камітэт Беларусі. Аб гэтым БЕЛТА паведамілі ў прэс-службе Выканаўчага камітэта СНД.

"Анатоль Пятровіч Лапо з 1981 па 2023 год праходзіў службу на розных пасадах пагранічных ведамстваў СССР і суверэннай Беларусі. З 2016 па 2023 год займаў пасаду старшыні Дзяржаўнага пагранічнага камітэта Рэспублікі Беларусь. За час праходжання службы ўзнагароджаны дзяржаўнымі ўзнагародамі - ордэнам "За службу Радзіме" II і III ступеней, медалямі "За баявыя заслугі", "За бездакорную службу" I і II ступеней. Мае ганаровае званне "Заслужаны пагранічнік Рэспублікі Беларусь", - сказаў у час прадстаўлення Канстанцін Моластаў.

"Гэта ўсебакова падрыхтаваны спецыяліст, дзяржаўнік. Вопытны, дасведчаны, выключна адказны кіраўнік. Мне імпануе яго падыход да выканання службовых абавязкаў і проста чалавечыя якасці, якія ён не раз праяўляў пры асабістых размовах", - дапоўніў характарыстыку новага прадстаўніка СКПВ першы намеснік генеральнага сакратара СНД Леанід Анфімаў.

У сваю чаргу Анатоль Лапо выказаў падзяку Савету камандуючых пагранічнымі войскамі за аказаны давер.

"Я вас не падвяду. Я пачынаў службу салдатам, радавым Батумскага пагранічнага атрада, і заўсёды ставіўся да службы адказна", - адзначыў Анатоль Лапо.

На пасадзе прадстаўніка Савета камандуючых пагранічнымі войскамі Анатоль Лапо змяніў Аляксандра Баечку.

версія для друку

зрабіць стартавай

дабавіць у выбранае