Падзеі

9 красавіка, Брэст /Кар. БЕЛТА/. На палігоне Брэсцкі сёння адбылася ўрачыстая цырымонія адкрыцця сумеснага батальённага тактычнага вучэння беларускіх і расійскіх дэсантнікаў, перадае карэспандэнт БЕЛТА.

У вучэнні задзейнічаны амаль 450 ваеннаслужачых і да 70 адзінак тэхнікі. Ад беларускага боку ўдзельнічаюць падраздзяленні 38-й асобнай гвардзейскай дэсантна-штурмавой брыгады сіл спецыяльных аперацый Узброеных Сіл. Расію прадстаўляе зводная рота 76-й гвардзейскай дэсантна-штурмавой дывізіі паветрана-дэсантных войскаў, узмоцненая інжынерна-сапёрным аддзяленнем.

"У падраздзяленні каля ста чалавек. Яно цалкам укамплектавана ваеннаслужачымі па кантракце. З сабой мы прывезлі камплект новай баявой экіпіроўкі "Ратнік" і парашутныя сістэмы. Узбраенне і тэхніку прадаставіў беларускі бок. Мэта вучэння - далейшае развіццё ваеннага супрацоўніцтва, удасканаленне навыкаў салдат і падраздзяленняў пры сумесным выкананні задач", - паведаміў намеснік камандзіра 104-га гвардзейскага дэсантна-штурмавога палка, начальнік паветрана-дэсантнай службы гвардыі падпалкоўнік Аляксей Андрэеў.

Задума вучэння заключаецца ў выяўленні, блакіраванні і знішчэнні незаконнага ўзброенага фарміравання, якое захапіла і ўтрымлівае важны стратэгічны аб'ект. Вучэнне з дэсантаваннем і баявой стральбой пройдзе ў тры этапы. "У час вучэння праверым зладжанасць падраздзяленняў. Мы павінны ўмець дзейнічаць разам, разумець правільна каманды. Акрамя таго, нам цікавы вопыт расійскіх калег - сур'ёзны, баявы", - адзначыў камандзір 38-й асобнай гвардзейскай дэсантна-штурмавой брыгады гвардыі палкоўнік Дзмітрый Собаль.

Актыўная фаза вучэння на палігоне Брэсцкі пройдзе з 10 па 12 красавіка.