Падзеі

30 студзеня, Мінск /Юлія Дылянок - БЕЛТА/. Актуальныя пытанні ўзаемадзеяння Беларусі і Еўрапейскага саюза абмяркоўваюцца на сустрэчы міністра замежных спраў Беларусі Уладзіміра Макея і Еўрапейскага камісара па еўрапейскай палітыцы суседства і перагаворах аб пашырэнні ЕС Ёханеса Хана, перадае карэспандэнт БЕЛТА.

Уладзімір Макей адзначыў важнасць візіту Ёханеса Хана ў Беларусь для развіцця беларуска-еўрапейскіх узаемаадносін, выказаўшы надзею на іх далейшую актывізацыю.

У сваю чаргу Ёханес Хан канстатаваў наяўнасць патэнцыялу ў адносінах Беларусі і ЕС, у тым ліку ў эканамічным плане. Паводле яго слоў, візіт дасць магчымасць абмеркаваць шэраг момантаў, якія ўяўляюць узаемны інтарэс.

Ёханес Хан сёння прыбыў з візітам у Беларусь. Плануюцца яго сустрэчы на розных узроўнях, у тым ліку з кіраўніцтвам урада, у час якіх будуць абмеркаваны актуальныя пытанні ўзаемаадносін Беларусі і ЕС. Размова пойдзе аб перспектывах развіцця гандлёва-эканамічнага і інвестыцыйнага супрацоўніцтва, узаемадзеянні ў сферы міжнароднай тэхнічнай дапамогі. Акрамя таго, будзе абмяркоўвацца ўмацаванне палітычнага дыялогу па лініі Беларусь - ЕС, трэба будзе абмеркаваць і іншыя аспекты ўзаемаадносін, якія ўяўляюць узаемную цікавасць.

Паводле інфармацыі прадстаўніцтва ЕС, бакі таксама абмяркуюць канкрэтныя задачы, узгодненыя на саміце "Усходняга партнёрства", і паглыбленне адносін паміж ЕС і Беларуссю. Гэта будзе адлюстравана ў новых Прыярытэтах партнёрства паміж ЕС і Беларуссю, якія будуць вызначаць далейшае супрацоўніцтва ў бліжэйшыя гады.