Падзеі

Адзіны рынак энергарэсурсаў павінен стаць адной з асноў інтэграцыі ў ЕАЭС - Пашынян

Нікол Пашынян. Фота з архiва

19 мая, Мінск /Кацярына Крышэнік - БЕЛТА/. Адзіны рынак энергарэсурсаў з недыскрымінацыйнымі прынцыпамі функцыянавання павінен стаць адной з асноў інтэграцыі ў Еўразійскім эканамічным саюзе. Аб гэтым заявіў прэм'ер-міністр Арменіі Нікол Пашынян на пасяджэнні Вышэйшага Еўразійскага эканамічнага савета, перадае карэспандэнт БЕЛТА.

"Ва ўмовах глабальных эканамічных выклікаў, перад якімі мы ўсе сёння стаім, неабходнасць найхутчэйшага фарміравання агульнага рынку газу для Арменіі адчуваецца асабліва востра. Як не раз мною было адзначана, адзіны рынак энергарэсурсаў з недыскрымінацыйнымі прынцыпамі функцыянавання павінен стаць адной з асноў нашай інтэграцыі. Без яго немагчымы якасны прагрэс інтэграцыйных працэсаў. Без яго немагчыма забяспечыць роўныя ўмовы эканамічнай дзейнасці для ўсіх удзельнікаў саюза", - падкрэсліў Нікол Пашынян.

Ён адзначыў асаблівае значэнне для Арменіі развіцця супрацоўніцтва ў ЕАЭС. "Больш чым упэўнены, што мы павінны ўмацоўваць наш саюз і ўдасканальваць асноватворныя інстытуты інтэграцыі. Мы павінны даказаць іх жыццяздольнасць у перыяд крызісу і быць гатовымі сумесна скарыстацца ўсімі эканамічнымі магчымасцямі, якія, відавочна, з'явяцца ў посткрызісны перыяд", - звярнуў увагу ён.

У гэтым кантэксце, на яго думку, маюць асаблівае значэнне Стратэгічныя напрамкі развіцця еўразійскай эканамічнай інтэграцыі да 2025 года, якія сёння абмяркоўваюцца на пасяджэнні савета. "Перакананы, што напрамкі супрацоўніцтва, акрэсленыя ў дакуменце, будуць садзейнічаць уздыму як інтэнсіўнасці, так і інавацыйнай прывабнасці саюза, павышэнню яго канкурэнтаздольнасці і навукова-вытворчага патэнцыялу", - сказаў Нікол Пашынян.

Ён падкрэсліў, што ў дакуменце аб стратэгічных напрамках развіцця эканамічнай інтэграцыі павінен быць зафіксаваны прынцып прымянення адзіных падыходаў да цэна- і тарыфаўтварэння на агульным рынку газу ЕАЭС, у тым ліку адзіных тарыфаў на паслугі, што аказваюцца суб'ектам натуральнай манаполіі пры транспарціроўцы і транзіце газу. "Наш саюз павінен імкнуцца да паэтапнага дасягнення гэтай мэты, што створыць спрыяльную глебу для якасна больш глыбокай эканамічнай інтэграцыі ў рамках саюза", - перакананы прэм'ер-міністр.

версія для друку

зрабіць стартавай

дабавіць у выбранае