Падзеі

Ад эканомікі да спорту. Кіраўнікі ўрадаў краін СНД падпісалі дакументы аб супрацоўніцтве

27 кастрычніка, Бішкек /Кар. БЕЛТА/. Дакументы аб супрацоўніцтве падпісаны па выніках пасяджэння Савета кіраўнікоў урадаў СНД у Бішкеку, перадае карэспандэнт БЕЛТА.

Удзельнікі пасяджэння Савета кіраўнікоў урадаў абмяняліся думкамі, разгледзелі ўсе пытанні, уключаныя ў парадак дня, і прынялі 20 дакументаў. "Гэтыя дакументы рэгламентуюць супрацоўніцтва краін Садружнасці на бліжэйшыя гады ў эканамічнай, гуманітарнай сферах, у галіне інавацый", - сказаў генеральны сакратар СНД Сяргей Лебедзеў.

Так, зацверджана Міждзяржаўная праграма супрацоўніцтва дзяржаў СНД у сферы геадэзіі, картаграфіі, прасторавых даных, геаінфармацыйных тэхналогій, дыстанцыйнага зандзіравання Зямлі, кадастравага ўліку і рэгістрацыі правоў на нерухомую маёмасць на перыяд да 2026 года.

Члены Савета кіраўнікоў урадаў зацвердзілі таксама канцэпцыю лічбавай трансфармацыі галін паліўна-энергетычнага комплексу дзяржаў - удзельніц СНД і адпаведны план мерапрыемстваў па яе рэалізацыі, Міждзяржаўную мэтавую праграму "Рэкультывацыя тэрыторый дзяржаў, якія падпалі пад уздзеянне ўраназдабыўных вытворчасцей", комплекс мерапрыемстваў па рэалізацыі пагаднення аб супрацоўніцтве ў горна-металургічнай галіне, палажэнне аб тэхналагічных платформах у рамках Міждзяржаўнай праграмы інавацыйнага супрацоўніцтва на перыяд да 2030 года.

На сустрэчы быў падпісаны план мерапрыемстваў па падрыхтоўцы і святкаванні ў 2025 годзе ў СНД 80-годдзя Перамогі ў Вялікай Айчыннай вайне. Як расказалі ў прэс-службе Выканкама СНД, дакумент прадугледжвае правядзенне шэрага мерапрыемстваў, прысвечаных знамянальным падзеям і памятным ваенным датам, мерапрыемстваў навуковага і інфармацыйна-асветнага характару, накіраваных на захаванне праўды аб вайне, выкрыццё спроб фальсіфікацыі падзей і вынікаў вайны, процідзеянне фашызму і неанацызму, а таксама выхаванне падрастаючага пакалення ў духу патрыятызму і любові да сваёй Айчыны.

Яшчэ адзін план, зацверджаны Саветам кіраўнікоў урадаў СНД, - па правядзенні ў Садружнасці ў 2024 годзе Года валанцёрскага руху. Дакумент складаецца з дзевяці раздзелаў, у яго ўвайшлі больш за 100 міжнародных мерапрыемстваў, такіх як форумы, сустрэчы, канферэнцыі з удзелам прадстаўнікоў розных краін.

На пасяджэнні таксама было прынята палажэнне аб Чэмпіянаце (Першынстве, Кубку) СНД. "Правядзенне такіх спаборніцтваў пашырыць магчымасці дзяржаў - удзельніц Садружнасці па падрыхтоўцы спартыўнага рэзерву і спартсменаў высокага класа за кошт удасканалення іх спаборніцкай дзейнасці, будзе садзейнічаць павышэнню іх спартыўнага майстэрства і набыццю вопыту ўдзелу ў міжнародных спартыўных спаборніцтвах, а таксама акажа станоўчы ўплыў на развіццё розных відаў спорту ў краінах Садружнасці", - падкрэслілі ў прэс-службе Выканкама СНД.

Акрамя таго, Савет кіраўнікоў урадаў СНД разгледзеў вялікі блок фінансавых пытанняў. Яны датычацца фінансавання далейшага развіцця аб'яднанай сістэмы проціпаветранай абароны дзяржаў Садружнасці, выканання адзінага бюджэту органаў СНД, фінансавання ў наступным годзе мерапрыемстваў па рэалізацыі Міждзяржаўнай праграмы павышэння якасці жыцця ветэранаў войнаў - удзельнікаў лакальных канфліктаў і членаў іх сем'яў, фінансавання мерапрыемстваў па прадаўжэнні пошуку ваеннаслужачых, без вестак прапаўшых у перыяд вайны ў Афганістане, пошуку месцаў пахаванняў, эксгумацыі, ідэнтыфікацыі астанкаў і перапахавання іх на Радзіме.

версія для друку

зрабіць стартавай

дабавіць у выбранае