Свята-Барысаглебская (Каложская) царква ў Гродне

Свята-Барысаглебская (Каложская) царква – архітэктурная жамчужына старажытнага Гродна, унікальны помнік старажытнага праваслаўнага дойлідства XII стагоддзя ў Беларусі і ўсёй Усходняй Еўропе. Яго ўнікальная асаблівасць – мноства керамічных гаршкоў-галаснікоў, якія ўбудаваны ў скляпенні сцен і выходзяць наверх рыльцамі, дзякуючы чаму многія стагоддзі тут захоўваецца добрая акустыка і так цудоўна гучаць царкоўныя песнапенні. Акрамя таго, апорныя слупы маюць рэдкае для праваслаўных храмаў круглае сячэнне, і пры невялікіх памерах будынка (даўжыня – 21,5 м, шырыня – 13,5 м) унутры царква здаецца прасторнай. Гэта дасягаецца і за кошт сцен (таўшчыня – каля 1,2 м), у кладцы якіх выкарыстоўвалася вельмі тонкая і пляскатая цэгла-плінфа.