Падзеі

Хрэнін: Беларусь імкнецца да пашырэння шматграннага супрацоўніцтва з дзяржавамі ШАС

Віктар Хрэнін. Фота з telegram-канала Міністэрства абароны

24 жніўня, Мінск /Кар. БЕЛТА/. Міністр абароны Беларусі Віктар Хрэнін прымае ўдзел у чарговай нарадзе міністраў абароны дзяржаў - членаў Шанхайскай арганізацыі супрацоўніцтва. Аб гэтым карэспандэнту БЕЛТА паведамілі ў прэс-службе Міністэрства абароны Беларусі.

"Перш за ўсё, хацелася б выказаць удзячнасць узбекскаму боку як старшынствуючаму ў арганізацыі ў гэтым годзе за запрашэнне прыняць удзел у чарговай нарадзе міністраў абароны дзяржаў - членаў Шанхайскай арганізацыі супрацоўніцтва. Для нас удзел у такім прадстаўнічым мерапрыемстве стаў чарговай знакавай падзеяй, аснову якой у 2018 годзе заклала Кітайская Народная Рэспубліка, а прадоўжылі Кыргызстан, Расія і Таджыкістан", - сказаў Віктар Хрэнін.

Ён адзначыў, што Беларусь імкнецца да далейшага пашырэння шматграннага супрацоўніцтва з дзяржавамі - членамі ШАС і таму падала заяўку на ўступленне ў арганізацыю ў якасці яе паўнапраўнага ўдзельніка. Віктар Хрэнін не выключыў, што ўжо на наступнай такой нарадзе Беларусь будзе ў новым статусе.

"На жаль, сённяшняе пасяджэнне праходзіць на фоне рэзкага ўскладнення ваенна-палітычнай абстаноўкі ў многіх рэгіёнах свету. Крыху больш за год таму, выступаючы на такім жа мерапрыемстве ў Душанбэ, я гаварыў аб тым, што сусветная палітыка стала ўсё больш непрадказальнай і хаатычнай, а сістэма міжнародных адносін істотна трансфармуецца. Сёння гэта стала яшчэ больш прыкметна. Свет хутка змяняецца. Карэнным чынам пераглядаюцца асновы светапарадку, які існаваў, а контуры новага пакуль не зусім бачныя", - лічыць міністр абароны Беларусі.

Віктар Хрэнін падкрэсліў, што негатыўны ўплыў на міжнародную абстаноўку аказвае імкненне асобных дзяржаў да аднабаковых падыходаў у міжнародных адносінах, асноўнай мэтай якіх з'яўляецца падтрыманне існуючага статус-кво ў парадыгме аднапалярнага свету. "Пры гэтым для дасягнення пастаўленых мэт, - сказаў ён, - чалавечыя жыцці не маюць каштоўнасці, і інтарэсы іншых не важныя. Стаўкі такія высокія, што яны зміраюцца з галабальнай рэцэсіяй, дэзарганізацыяй сусветнай эканомікі, а таксама праблемамі ў энергетычнай і харчовай сферах. Больш таго, усе крокі, якія робіць калектыўны Захад пад кіраўніцтвам ЗША, значна павышаюць рызыку ўзнікнення новых ваенных сутыкненняў у розных кутках нашай планеты".

Паводле слоў міністра, такія дзеянні ўяўляюць рэальную пагрозу і патрабуюць сур'ёзных мер па забеспячэнні нацыянальнай бяспекі. "Мы разумеем, што Беларусь знаходзіцца ў эпіцэнтры процістаяння. І мы зрабілі свой выбар - гэта ўсебаковая падтрымка нашага стратэгічнага саюзніка, Расіі, якая праводзіць спецыяльную ваенную аперацыю ва Украіне, што стала фарпостам навязанай вельмі агрэсіўнай палітыкі і разменнай манетай у руках сваіх еўраатлантычных куратараў. У той жа час Беларусь не адмаўляецца ад уласцівай ёй палітыкі ўрэгулявання любых канфліктаў мірным шляхам, аднаўлення "мастоў даверу" і аднаўлення разбураных сувязей. Наша краіна выступае за фарміраванне ўмоў, пры якіх існуючыя праблемы па вострых пытаннях міжнароднага і рэгіянальнага парадку дня будуць знаходзіць рашэнне на аснове калектыўнага падыходу, які не церпіць канфрантацыйнага мыслення, дамінавання або нейкай выключнасці", - заявіў міністр абароны Беларусі.

На заканчэнне Віктар Хрэнін падкрэсліў, што Беларусь гатова ўсямерна садзейнічаць развіццю больш цеснага ўзаемадзеяння паміж ШАС і такімі арганізацыямі, як АДКБ і СНД. Ён выказаў падтрымку ініцыятывам дзяржаў - членаў ШАС па пашырэнні шматбаковага супрацоўніцтва ў галіне абароны і бяспекі ў мэтах будаўніцтва больш справядлівага і збалансаванага светапарадку.

версія для друку

зрабіць стартавай

дабавіць у выбранае