Падзеі

Вучоныя Беларусі, Польшчы і ЗША актывізуюць супрацоўніцтва ў галіне біяразнастайнасці

Фота з архiва

10 жніўня, Мінск /Кар. БЕЛТА/. Вучоныя Беларусі, Польшчы і ЗША актывізуюць трохбаковае супрацоўніцтва і правядзенне сумесных мерапрыемстваў у галіне біяразнастайнасці і захавання ўнікальных прыродных зон. Такое рашэнне прынята па выніках пасяджэння рабочай групы 7-9 жніўня ў Інстытуце даследавання млекакормячых Польскай акадэміі навук, паведамілі карэспандэнту БЕЛТА ў прэс-службе Нацыянальнай акадэміі навук Беларусі.

У мерапрыемстве прынялі ўдзел дэлегацыі НАН Беларусі, Польскай акадэміі навук і Нацыянальных акадэмій навук, інжынерыі і медыцыны ЗША. Дэлегацыю Беларусі ўзначальваў намеснік старшыні Прэзідыума НАН акадэмік Аляксандр Кільчэўскі. Даследчыкі трох краін абмеркавалі арганізацыйныя пытанні, наступныя навуковыя мерапрыемствы, азнаёміліся з аб'ектамі Белавежскага нацыянальнага парку (Польшча). Члены дэлегацыі НАН прадставілі прэзентацыю навуковай дзейнасці, прыродных аб'ектаў, інфраструктуры, дзейнасці вучоных Нацыянальнай акадэміі навук па захаванні беларускай часткі Белавежскай пушчы.

Праведзеная сустрэча вучоных стала пачатковым этапам арганізацыі і падрыхтоўкі важнага мерапрыемства - міжнароднай канферэнцыі Conservation Genomics ("Геноміка захавання"), якую плануецца правесці восенню 2022 года на тэрыторыі Нацыянальнага парка "Белавежская пушча", НАН Беларусі і на тэрыторыі Польшчы. Асноўная мэта форуму - прымяненне атрыманых ведаў для захавання знікаючых відаў жывой прыроды.

Як адзначылі ў прэс-службе, адной з важнейшых тэматык супрацоўніцтва НАН Беларусі і Польскай акадэміі навук з'яўляецца праблема Белавежскай пушчы, якая з'яўляецца нацыянальным здабыткам дзвюх краін. У прыватнасці, гэта захаванне біяразнастайнасці, аднаўленне гідралагічнага рэжыму лясных экасістэм і інш.

Канферэнцыя Conservation Genomics праводзіцца кожныя паўтара года на працягу больш як двух дзесяцігоддзяў. У якасці выкладчыкаў выступаюць вядомыя вучоныя з розных дзяржаў свету. Удзельнікі курса вывучаюць метады, інтэрпрэтацыю і прымяненне малекулярна-генетычнага аналізу для захавання знікаючых відаў, а таксама дзеляцца сваім вопытам вывучэння з'яў у гэтай важнай галіне.

версія для друку

зрабіць стартавай

дабавіць у выбранае