Падзеі

Вопыт Белстата па распаўсюджванні вынікаў перапісу насельніцтва прадстаўлены на Тыдні перапісаў у Жэневе

20 верасня, Мінск /Кар. БЕЛТА/. Вопыт Нацыянальнага статыстычнага камітэта Беларусі па распаўсюджванні вынікаў перапісу насельніцтва прадстаўлены на Тыдні перапісаў у Жэневе пад эгідай Еўрапейскай эканамічнай камісіі Арганізацыі Аб'яднаных Нацый (ЕЭК ААН) і Фонду ААН у галіне народанасельніцтва (ЮНФПА), паведамілі БЕЛТА ў прэс-службе Белстата.

Штогадовы Тыдзень перапісаў аб'ядноўвае два мерапрыемствы: рабочы семінар па нарошчванні патэнцыялу ў галіне перапісаў насельніцтва і жыллёвага фонду і нараду групы экспертаў па перапісах насельніцтва і жыллёвага фонду, якія служаць платформай для абмену вопытам, павышэння ўзроўню ведаў па пытаннях, звязаных з планаваннем і правядзеннем перапісаў насельніцтва і жыллёвага фонду ў краінах ЕЭК ААН.

У мерапрыемствах прымаюць удзел намеснік старшыні Белстата Жанна Васілеўская і начальнік галоўнага ўпраўлення дэмаграфічнай статыстыкі і перапісу насельніцтва Белстата Ірына Бічан.

Прадстаўнікі Белстата расказалі аб метадах і сучасных тэхналогіях, якія прымяняюцца органамі дзяржаўнай статыстыкі для распаўсюджвання падагульняючых даных перапісаў. "Асноўнай мэтай перапісу з'яўляецца атрыманне неабходнай інфармацыі аб дэмаграфічных, сацыяльна-эканамічных і іншых характарыстыках насельніцтва краіны, а таксама адкрытасць падагульняючых даных, што дазваляе забяспечыць доступ да іх любому чалавеку", - адзначыла Жанна Васілеўская.

Ужо два гады ў Белстаце функцыянуе інфармацыйна-аналітычная сістэма "Падагульняючыя даныя перапісаў насельніцтва Рэспублікі Беларусь". Гэты інструмент стаў даступны для ўсіх карыстальнікаў без рэгістрацыі і стварэння ўліковых запісаў, а таксама прадаставіў магчымасць супастаўляць даныя перапісу 2009 і 2019 гадоў, фарміраваць табліцы па індывідуальных запытах, будаваць графікі, дыяграмы і картаграмы па параметрах. Нягледзячы на прастату сістэмы і дружалюбны інтэрфейс для карыстальнікаў на рэсурсе былі размешчаны кіраўніцтва і відэаролік з тлумачэннямі, праведзены шэраг навучальных семінараў.

У ходзе рабочага семінара прадстаўнікі Белстата падзяліліся далейшымі планамі па ўдасканаленні метадаў распаўсюджвання даных з выкарыстаннем ГІС-тэхналогій - распрацоўцы інфармацыйна-аналітычнай сістэмы "Геастатыстыка". "Фактычна гэта будзе сістэма інтэрактыўнай графічнай візуалізацыі ўсёй афіцыйнай статыстыкі. Акрамя даных перапісу насельніцтва 2019 года будзе дадаткова загружана інфармацыя па розных галінах статыстыкі, у тым ліку па бізнес-дэмаграфіі", - адзначыла намеснік старшыні.

Візуалізацыя даных прадугледжвае розны ўзровень іх дэзагрэгацыі з захаваннем канфідэнцыяльнасці. Карыстальнікам будзе прадастаўлена магчымасць атрымліваць інфармацыю аб тэрыторыі рэспублікі з улікам яе сацыяльна-эканамічных і дэмаграфічных характарыстык. "Сістэма будзе даступна ў любым пункце свету на беларускай, рускай і англійскай мовах, уключаючы і на мабільных устройствах. Карыстальнікі змогуць ажыццяўляць выгрузку рознай інфармацыі ў зручным для іх фармаце", - падкрэсліла Жанна Васілеўская.

версія для друку

зрабіць стартавай

дабавіць у выбранае