Падзеі

У Савеце Рэспублікі не выключаюць ініцыявання змяненняў у прававыя акты ЕАЭС для падтрымкі экспарту

Сяргей Рачкоў. Фота з архiва

14 мая, Мінск /Кар. БЕЛТА/. У Савеце Рэспублікі не выключаюць ініцыявання змяненняў у прававыя акты Еўразійскага эканамічнага саюза для падтрымкі экспарту. Аб гэтым сёння на пасяджэнні секцыі навукова-кансультатыўнага савета пры Прэзідыуме Савета Рэспублікі заявіў старшыня Пастаяннай камісіі па міжнародных справах і нацыянальнай бяспецы Сяргей Рачкоў, перадае карэспандэнт БЕЛТА.

Парламентарыі, вучоныя, кіраўнікі прамысловых прадпрыемстваў, дыпламаты абмеркавалі магчымыя шляхі развіцця экспарту беларускіх тавараў і паслуг ва ўмовах крызісу з-за пандэміі. Размова, у прыватнасці, ішла аб мерах падтрымкі экспарцёраў і захаванні канкурэнтаздольнасці беларускіх тавараў і паслуг на знешніх рынках. Удзельнікі пасяджэння разгледзелі ў тым ліку захады, якія трэба зрабіць на заканадаўчым узроўні. "На маю думку, парламентарыям разам з зацікаўленымі арганізацыямі мэтазгодна прааналізаваць неабходнасць прыняцця новых і ўдасканалення дзеючых нарматыўных прававых актаў Беларусі, якія рэгулююць парадак экспарту тавараў і паслуг. Магчыма, у гэтых мэтах таксама спатрэбіцца ініцыяваць змяненні прававых актаў Еўразійскага эканамічнага саюза", - адзначыў Сяргей Рачкоў. Ён лічыць, што сенатары і дэпутаты павінны актывізаваць работу па прыняцці законапраектаў, якія забяспечваюць аператыўнае ўступленне ў сілу міжнародных дагавораў эканамічнай накіраванасці, у тым ліку тых, што прадугледжваюць стварэнне зон свабоднага гандлю Беларусі з замежнымі дзяржавамі і інтэграцыйнымі аб'яднаннямі.

Сяргей Рачкоў назваў секцыю пры Прэзідыуме Савета Рэспублікі важнай дыскусійнай пляцоўкай. Выпрацаваныя рэкамендацыі выкарыстоўваюцца ў заканатворчасці, правапрымяняльнай практыцы, даводзяцца да ўрада і зацікаўленых арганізацый. "Эканоміка Беларусі адкрытая, экспартна арыентаваная. Абстаноўка на знешніх рынках сёння няпростая. Вынікі знешняга гандлю за першы квартал таксама аб гэтым сведчаць. Мы не можам сядзець склаўшы рукі. Трэба думаць, як мінімізаваць наступствы сусветнага эканамічнага крызісу, шукаць шляхі захавання дынамікі і, магчыма, нарошчвання паставак на знешнія рынкі, - падкрэсліў сенатар, адказваючы на ​​пытанні журналістаў. - Заўсёды, калі ёсць складанасці, адначасова адкрываюцца і новыя вокны магчымасцей". У якасці прыкладу парламентарый прывёў экспарт паслуг, які ў першым квартале дэманструе станоўчую дынаміку. На знешніх рынках у цяперашняй сітуацыі могуць быць асабліва запатрабаваны беларускія прадукты харчавання, асобныя віды медыцынскага абсталявання. У Савеце Рэспублікі разлічваюць замацаваць гэтыя тэндэнцыі і нарасціць пастаўкі.

версія для друку

зрабіць стартавай

дабавіць у выбранае