Падзеі

У Анкары прайшлі перагаворы міністраў замежных спраў Беларусі і Турцыі

Сяргей Алейнік і Хакан Фідан. Фота МЗС

8 лістапада, Мінск /Кар. БЕЛТА/. У час афіцыйнага візіту ў Турцыю міністр замежных спраў Беларусі Сяргей Алейнік правёў перагаворы з турэцкім калегам Хаканам Фіданам. Аб гэтым БЕЛТА паведамілі ў прэс-службе беларускага знешнепалітычнага ведамства.

Бакі канстатавалі, што за больш як 30-гадовую гісторыю дыпламатычных адносін Беларусь і Турцыя выбудавалі шматузроўневую сістэму супрацоўніцтва: кантактуюць кіраўнікі дзвюх дзяржаў, узаемадзейнічаюць урады, парламенты, міністэрствы і ведамствы.

"У сувязі з гэтым адзначана, што за мінулыя чатыры месяцы гэта ўжо трэцяя сустрэча міністраў замежных спраў. Абмеркаваны блок двухбаковых пытанняў. Першарадная ўвага ўдзелена гандлёва-эканамічным адносінам, якія дынамічна развіваюцца", - расказалі ў міністэрстве.

Апошнія два гады тавараабарот паміж дзвюма краінамі стабільна перавышаў $1 млрд. Згодна з турэцкімі данымі, па выніках бягучага года ён перавысіць $1,5 млрд. Таму важнай тэмай сустрэчы стала сістэматызацыя ўсяго аб'ёму двухбаковага гандлю і актывізацыя механізмаў у сферах лагістыкі, транспарту, сельскай гаспадаркі і іншых.

Усе гэтыя пытанні ў паглыбленым парадку будуць абмеркаваны ў час 11-га пасяджэння сумеснай міжурадавай камісіі па эканамічным супрацоўніцтве, запланаванага на 8 лістапада.

"У частцы палітычнага блока разгледжаны графік перспектыўных кантактаў на розных узроўнях. Субяседнікі канстатавалі падабенства пунктаў гледжання адносна большасці актуальных міжнародных праблем. У гэтым кантэксце падкрэслена адказнае стаўленне Беларусі і Турцыі да пытання харчовай бяспекі. Адзначаны пазітыўныя намаганні турэцкага боку ў дасягненні і рэалізацыі так званай збожжавай здзелкі", - падкрэслілі ў МЗС.

На гэтым фоне Сяргей Алейнік падкрэсліў злачынны характар незаконных санкцый ЕС і ЗША на пастаўку і транзіт беларускіх калійных угнаенняў, без якіх немагчыма вырашыць праблему голаду ў той час, калі, паводле даных ААН, яна актуальная для трох чвэрцяў насельніцтва планеты.

Кіраўнік МЗС Беларусі таксама адзначыў, што Мінск і Анкара з самых першых дзён канфлікту ва Украіне заклікалі і настойвалі на яго спыненні ў самыя кароткія тэрміны. У час сустрэчы таксама выказана заклапочанасць рэзкім абвастрэннем абстаноўкі ў зоне палесціна-ізраільскага канфлікту і буйнамаштабнай эскалацыяй баявых дзеянняў, у выніку якой ёсць шматлікія ахвяры сярод мірнага насельніцтва.

Міністр замежных спраў Беларусі падкрэсліў, што любыя канфлікты павінны вырашацца палітыка-дыпламатычным шляхам: "Мы неаднаразова гаварылі, што, калі не спыніцца цяпер, то канфлікт можа прывесці да непапраўных для рэгіёна і ўсяго свету наступстваў".

Дадаткова абмеркаваны ўзаемадзеянне ў сферах культуры і аховы здароўя, навукова-тэхнічнае супрацоўніцтва, развіццё кантактаў паміж маладзёжнымі арганізацыямі.

версія для друку

зрабіць стартавай

дабавіць у выбранае