Падзеі

12 лютага, Мінск /Кар. БЕЛТА/. ЦВК Беларусі стварыў міжведамасную экспертную групу па вывучэнні рэкамендацый АБСЕ і выпрацоўцы прапаноў па іх прымяненні. Аб гэтым паведаміў карэспандэнту БЕЛТА сакратар Цэнтрвыбаркама Мікалай Лазавік.

"Завяршыліся перагаворы з усімі членамі ЦВК, і ў выніку апытання прынята пастанова аб міжведамаснай экспертнай рабочай групе па разглядзе рэкамендацый БДІПЧ АБСЕ па пытаннях удасканалення выбарчага працэсу ў Беларусі", - расказаў Мікалай Лазавік. У адпаведнасці з дакладам, пры Цэнтральнай камісіі ствараецца група экспертаў, у якую ўваходзяць прадстаўнікі ЦВК, Нацыянальнага цэнтра заканадаўства і прававых даследаванняў, абедзвюх палат парламента, Міністэрства юстыцыі, Міністэрства інфармацыі і Міністэрства замежных спраў.

Плануецца правесці аналіз рэкамендацый БДІПЧ АБСЕ, якія змешчаны ў падагульняючай справаздачы місіі па назіранні за выбарамі Прэзідэнта Беларусі ў 2015 годзе, і на аснове гэтага аналізу будуць распрацаваны прапановы па ўдасканаленні выбарчага працэсу для далейшага разгляду ў Цэнтральнай камісіі і дакладу кіраўніку дзяржавы. "Гэта група, як плануецца, у першую чаргу разгледзіць тыя прапановы, якія можна рэалізаваць яшчэ да парламенцкіх выбараў 2016 года, інакш кажучы, не змяняючы заканадаўчай базы, шляхам прыняцця пастаноў ЦВК (г.зн. шляхам удасканалення правапрымяняльнай практыкі). Гэтыя нормы можна закласці ў метадычныя рэкамендацыі, якія цяпер распрацоўваюцца Цэнтральнай камісіяй, у трэнінг для членаў участковых выбарчых камісій, каб павысіць празрыстасць і галоснасць выбарчага працэсу. Наступны этап - гэта, магчыма, выпрацоўка прапаноў, якія закранаюць змяненні законаў, кодэксаў, Канстытуцыі. Гэта больш працяглы працэс", - заўважыў Мікалай Лазавік.

Размова аб стварэнні экспертнай групы вялася сёння на сустрэчы Прэзідэнта Аляксандра Лукашэнкі са старшынёй ЦВК Лідзіяй Ярмошынай. Кіраўнік дзяржавы даў адпаведнае даручэнне.

Лідзія Ярмошына, у прыватнасці, паведаміла, што першае пасяджэнне плануецца правесці 16 лютага. Экспертная група будзе працаваць пад кіраўніцтвам Цэнтрвыбаркама і праз месяц з пачатку работы павінна прадставіць рэкамендацыі або прапановы па той пазіцыі, якую выказала АБСЕ па выніках прэзідэнцкай выбарчай кампаніі 2015 года ў Беларусі.

На арганізацыйнае пасяджэнне міжведамаснай экспертнай групы, якое пачнецца ў 12.00, запрашаюцца прадстаўнікі сродкаў масавай інфармацыі. Журналістам, жадаючым прыняць у ім удзел, неабходна падаць заяўку праз прыёмную ЦВК.